बिष्णु कुमार आले
असार ६ अर्घाखाँची ।
कपिलवस्तुको कृष्णनगर नगरपालिकाबाट प्रहरीले बन्दुक, गोली र बारुद बरामद गरको छ । कृष्णनगर नगरपालिका–८ लोहरौला बस्ने अस्लम मुसलमानको बाख्राको गोठबाट दुई थान बाह्रबोर बन्दुक, पाँच थान जङ्गी राउन्ड गोली, ११ थान बाह्रबोर बन्दुकको पड्किएको खोका, तीन सय ग्राम बारुद ,५७ वटा छर्रा र जनावरलाई पासो लगाउन प्रयोग गरिने तीन वटा जाल प्रहरीले बरामद गरेको हो । प्रहरीले खोजतलास गर्दा घरदेखि एक किलो मिटर पुर्व – उत्तर टाढा खरले छाएको कच्छी बाख्राको खोरमा लुकाई छिपाई राखेको अवस्थामा शनिबार साँझ हातहतियार फेलापारी बरामत गरेको हो ।
हातहतियार लुकाएको सूचनाका आधारमा इलाका प्रहरी कार्यालय बहादुरगञ्ज र इलाका प्रहरी कार्यालय गणेशपुरबाट खटिएको प्रहरीको टोलीले गोठ तलासी गर्दा हातहतियार फेला पारेको हो । अस्लम मुसलमानको खोजीकार्य भैरहेको तथा हातहतियार बारे थप अनुसन्धान अघि बढाईएको जिल्ला प्रहरी कार्यालय कपिलवस्तुले जनाएको छ । माओवादी नेता दीपक पाण्डेको हत्याका योजनाकार तथा हतियार सहित एघार जनालाई पक्राउ गरि सार्वजनिक गरेको कपिलवस्तु प्रहरीले बाख्राको खोरबाट हातहतियार बरामत गरि अर्को सफलता हात पारेको हो ।
प्रकाशित : २०७८ असार ६, आईतवार ०९:५५
