हरि आचार्य कपिलवस्तु, असार ११
लागु औषध दुरुपयोग तथा अवैध ओसारपसार विरुद्ध अन्तराष्ट्रिय दिवस २०७८ अन्तर्गत कपिलवस्तुमा सामुहिक अन्तक्रिया तथा खुला छलफल गरिएको छ । जिल्ला प्रशासन कार्यालय कपिलवस्तु र जिल्ला प्रहरी कार्यालय कपिलवस्तुको आयोजनामा सदरमुकाम तौलिहवामा उक्त कार्यक्रम सम्पन्न गरिएको हो । लागु औषध रहित परिवार, स्वस्थ जीवनको आधार भन्ने मुल नारका साथ उक्त कार्यक्रम गरिएको हो ।
कार्यक्रममा जिल्ला प्रहरी कार्यालय कपिलवस्तुका प्रहरी नायव उपरिक्षक (डिएसपि) धर्मराज भण्डारीले लागु औषध भनेको के हो ? यसका असर, यसबाट छुटकारा पाउने तरिका र यसका प्रकार तथा कच्चा पदार्थहरुको बारेमा स्पष्ट पारेका थिए । उनले धर्म संस्कृतिको नाममा समाजमा लागु औषध तथा दुवर््यसनीको दुरुपयोग बढेकाले सबै जना सचेत हुनुपर्नेमा जोड दिएका थिए ।

डिएसपि भण्डारीले लागु औषधले व्यक्तिगत जीवन, परिवार, सामाजिक जीवन, आर्थिक विचलन, सामाजिक मन मर्यादामा असर पर्नुका साथै अन्त्यमा ज्यानै गुमाउनु पर्ने असरहरुको बारेमा पनि स्पष्ट पारेका थिए । कपिलवस्तु जिल्लाको चालु आर्थिक बर्ष २०७७÷७८ मा लागु औषध सम्बन्धी विवरण समेत प्रस्तुत गरिएको थियो ।

वास्तवमा साथी संगत, कौतुहलता, पारिवारिक समस्या, पढाईमा समस्या लगायत विभिन्न लागुऔषधमा फस्ने माध्यमहरुको बारेमा छलफल गरिएको थियो । कार्यक्रममा लागु औषध नियन्त्रण ऐन, २०३३ को बारेमा छलफल गर्नुका साथै यसको प्रयोग तथा अवैध ओसारपसार गर्दा हुने कानुनी कारवाहीको बारेमा पनि प्रस्ट पारिएको थियो ।

कार्यक्रममा उपस्थित वक्ताहरुले नयाँ पुस्ता, युवाहरु लागु औषध दुवर््यसनीमा फसेकाले राज्य संयन्त्रले नै अझ प्रभावकारी रुपमा पहल गर्नुपर्ने सुझाव दिएका थिए । त्यस्तै कपिलवस्तु सिमानाकाको नजिक रहेको र अभिभावकको अज्ञानताका कारण यसको प्रयोग र ओसारपसार बढेकाले औपचारिक भन्दा अनौपचारिक चेतनामुलक कार्यक्रम गर्न आवश्यक रहेकोमा सरोकारवालाले जोड दिएका थिए ।

सरोकारवालाको जिज्ञासा दिंदै प्रमुख जिल्ला अधिकारी चक्रपाणि पाण्डेले प्रशासन, प्रहरी तथा पत्रकारले मात्र लागु औषध नियन्त्रण गर्न नसकिने भन्दै सबैजना सचेत रहन आवश्यक रहेको बताए । उनले कार्यक्रमको उद्देश्य माथि प्रकाश पार्दै सिडिओ पाण्डेले सञ्चार माध्यमबाट सन्देशमुलक सुचना प्रसारण तथा प्रकाशन आग्रह गरे । उनल् लागुऔषध नियन्त्रणका लागि यस क्षेत्रमा काम गर्ने संघसंस्थासंग समन्वय गर्न प्रशासन तयार रहेको बताए ।

प्रमुख जिल्ला अधिकारी चक्रपाणि पाण्डेको अध्यक्षता रहेको कार्यक्रममा विभिन्न सामाजिक संघ संस्था, जिल्ला प्रहरी कार्यालयका प्रतिनिधि लगायत जिल्लाका सक्रिय सञ्चारकर्मी लगायतको उपस्थिती रहेको थियो । सहायक प्रमुख जिल्ला अधिकारी गणेश नेपालीको सञ्चालनमा कार्यक्रम सम्पन्न भएको थियो ।