शिव खनाल, कपिलवस्तु
बुद्धभूमि नगरपालिकाले बजार अनुगमन कार्य शुरु गरेको छ। बजार अनुगमनको क्रममा नगरक्षेत्रमा अखाद्य वस्तु बिक्रीका लागि राखेको भेटिएको छ । म्याद नाघेका र अखाद्य वस्तु बिक्री गर्न नपाइने भए पनि बजारमा यस्ता सामग्रीहरू जताततै भेटिएका हुन् । व्यापारीहरूले स्थानीय प्रशासन र उपभोक्ताको आँखा छलेर अखाद्य वस्तु बिक्री गरिरहेका छन् ।
हिन्दु नेपालीहरूको मुख्य चाड दसैं र तिहार नजिकिंदै गर्दा नगरपालिकाले बजार अनुगमनलाई तीव्र बनाएपछि बजारमा अखाद्य वस्तु फेला परेका हुन् । बुद्धभूमि नगरपालिकाले थालेको बजार अनुगमनका क्रममा म्याद गुज्रेका सामानहरू पनि बिक्रीका लागि राखेको भेटिएको हो । पसलमा म्याद गएका सामानहरू पनि बिक्रीका लागि राखेको फेला परेको हो । अनुगमन टोलीले यस्ता सामानहरू जफत गरेर नष्ट गर्ने अभियान थालेको छ ।
नगरको अनुगमन टोलीले सोमबार बुद्धभूमि – ९ स्थित ईमिलिया र डुमराका गरी १० पसलहरूमा र साप्ताहिक लाग्ने इमिलिया हाट बजारमा अनुगमन गरेको हो । सो क्रममा गुणस्तरहिन भारतिय ढक तराजु र म्याद सकिएका वस्तुहरू पनि बिक्रीका लागि राखेको पाइएपछि अनुगमन टोलीले त्यस्ता सामान जफत गरेको छ ।
अनुगमनका क्रममा दालमोठ, चक्लेट, विस्कुट, सुजी, अचार, क्रिम, पेय पदार्थ, माछा अचार, फुरनदाना, चामल लगायतका खाद्य पदार्थहरू म्याद गुज्रदा पनि बिक्रीमा राखेको भेटाएको हो । यस्तै चुरोट, सुर्ति, पान पराग पुकार लगाएतका सुर्तिजन्य पदार्थको बिक्रि अनुमति नलिएको, व्यवसाय अन्तःशुल्कमा दर्ता नगरेको, स्टिकर नै नटाँसेको राजस्व छली गरेको त्यस्ता सामाग्रि समेत बरामद गरिएको छ ।
बजार अनुगमनको बेलामा दैनिक उपभोग्य वस्तुमध्ये धेरैजसो बालबालिकाहरूका लागि उपभोग हुने वस्तुहरू अखाद्य भेटिएको हो । नगरभित्र संचालित पसलहरुमा म्याद गुज्रिएका अखाद्य वस्तुहरु बेचविखन भइरहेको भनेर नगरपालिका आएको नागरिकका गुनासो र चासोको आधारमा गरिएको अनुगमनको क्रममा आज अनुगमन गरिएका सबै पसलहरुमा त्यस्ता सामग्रीहरु फेला परेको बजार अनुगमन टोलीका संयोजक अधिकृत विजय भुसालले जानकारी दिनु भयो । उहाँले उपभोक्ताहरुलाई कुनै सामाग्री खरिद गर्दा सामग्रीको म्याद हेरेर मात्र खरिद गर्न आग्रह गर्नुभयो ।
अखाद्य सामाग्री फेला परे नगरपालिका वा नजिकको प्रहरी कार्यालयमा जानकारी गराउन आग्रह गर्दै उपभोक्ता अधिकारको बारेमा सबै सचेत हुनुपर्नेमा जोड दिनु भयो । प्याकेजिङ्ग गरेका खाद्य सामाग्रीहरुनै म्याद नभएको पाइएकाले ति सामागीहरुको प्रयोग गर्ने बालबालिकाहरुको स्वास्थ्यमा नकारात्मक असर परिरहेको स्वास्थ्य शाखाका अधिकृत गोकर्ण अर्यालको भनाइ छ ।
बालबालिकाहरुले पसलमा सामाग्री खरिद गर्दा म्याद नहेर्ने भएकाले यस कुरामा अभिभावक एवम् सरोकारवाला निकाय एकदमै गम्भीर हुनुपर्ने उहाँले बताउनु भयो । ईलाका प्रहरी कार्यालय गोरूसिङ्गेका प्रहरी नायब निरिक्षक कृष्ण प्रसाद खनालले दसैं र तिहार जस्ता ठूला पर्वहरू नजिकिंदै गर्दा आफूहरूले नगरपालिकाको सहकार्यमा बजार अनुगमनलाई तीव्र बनाएको बताउनु भयो । चाडपर्वको बेलामा व्यवसायीहरूले अखाद्य वस्तु बिक्री गर्ने र सामानको कालोबजारी गर्ने भएकाले अनुगमनलाई कडाई गरिएको उहाँको भनाइ छ ।
उपभोक्ताको स्वास्थ्यमा खेलवाड गर्ने जो कोहीलाई पनि कडा कारबाही गरीने चेतावनी दिनु भयो । त्यस्तै अनुगमन टोलीले व्यापारीहरूलाई म्याद नाघेका र अखाद्य वस्तु बिक्रीमा नराख्न निर्देशन दिएको छ । टोलीले पहिलोपटक सचेत गराएको र दोस्रो पटक अनुगमनमा यस्तै अखाद्य वस्तु भेटिए कानुनी कारबाहीको प्रक्रियामा लैजाने बताएको छ ।
त्यस्तै अनुगमन कार्यमा प्रमुख प्रशासकीय अधिकृत अनिल पौडेल समेत फिल्डमा खटिइ अनुगमन टोलिको हौसला बढाउनु भएको थियो। अनुगमन टोलिमा उपभोक्ता हित संरक्षक ईन्द्रमणी पौडेल, बुद्धभूमि उद्योग वाणिज्य संघ प्रतिनिधि शोभाखर बन्जाडे, पत्रकाहरु सुशिल गैरे तथा शिव खनाल, प्रहरी हवल्दार अनिल थापा, प्रहरी जवान चन्द्र बहादुर लम्साल लगाएतको सहभागिता रहेको थियो । झफत गरीएका म्याद नाघेका सम्पुर्ण अखाद्यवस्तुहरूलाई बजार अनुगमन टोलीका सम्पुर्ण सदस्य, प्रमुख प्रशासकीय अधिकृत तथा नगरका अन्य कर्मचारीको रोहवरमा खाडल खनी नगरपालिका नजिकै जलाएर नष्ट गरिएको छ ।
