बुटवल ,कार्तिक ११
संघर्षशील पत्रकार महिला सम्मान तथा शुभकामना आदानप्रदान कार्यक्रम बुटवलमा समपन्न भएको छ ।बिहीबार क्रियाशील पत्रकार महिला रुपन्देहीले आयोजनामा एसियन पार्टी होटल बुटवलमा कार्यक्रम सम्पन्न भएको हो ।
कार्यक्रममा रुपन्देहीको तिलोत्तमा नगरपालिका उपप्रमुख जागेश्वरी देवी चोधरीले पत्रकारितामा महिला सहभागिता बढ्नुपर्ने बताउँदै निष्पक्ष हुनुपर्नेमा जोड दिएकी छन्। उनले पत्रकारितामा राजनीतिक गन्ध आउन थालेको भन्दै निष्पक्ष भएर सत्य तथ्य समाचार सम्प्रेक्षण गर्नुपर्नेमा उनले जोड दिइन्।
उपमेयर चौधरीले हरेक क्षेत्रमा महिला हेपिएको बताउँदै मिडियाले महिलाका आवाज बुलन्द गर्न सक्रिय भूमिका निर्वाह गर्नुपर्ने बताइन् । उनले महिलाहरु राजनीतिक, पत्रकारिता, कर्मचारी लगाएतका थुप्रै क्षेत्रहरुमा महिलाहरुले धेरै नै संघर्ष गर्नुपर्ने बताइन्।
शिक्षा, विज्ञान, यूवा तथा खेलकुद मन्त्रालयका सामाजिक विकास महाशाखा प्रबन्धक शारदा बस्यालले महिलाहरुले क्रियाशील भएर कामहरु गर्नुपर्नेमा जोड दिईन् । उनले पत्रकारका आवाजले समाजमा सकारात्मक प्रभाव पर्ने बताउँदै वास्तविक समाचार सम्पादन गर्नुपर्ने बताइन्।
नेपाल पत्रकार महासंघका केन्द्रीय सदस्य भवानीप्रसाद पाण्डेले पत्रकारितामा महिलाको क्रियाशीलता रहेको बताएका छन् । उनले घरको कामकाज हुँदा हुँदै पनि सक्रिय भएर पत्रकारिता पेशामा लाग्नु गौरवको कुरा रहेको बताए ।
पाण्डेले महिला पत्रकारहरुको सीप, दक्षता वृद्धि गर्न महासंघले विभिन्न कार्यक्रमहरु सञ्चालन गर्ने विश्वास व्यक्त गरे । उनले लुम्बिनी प्रदेश सरकारले सञ्चार विधेयक ल्याएर पत्रकारको कलम बन्द गर्न लागेको बताए ।
कार्यक्रममा नेपाल पत्रकार महासंघ लुम्बिनी प्रदेशका महासचिव बिक्रम खड्काले पत्रकारितामा महिलाको सहभागिता उल्लेखनीय बनाउन महासंघ लुम्बिनी प्रदेशले विभिन्न कदमहरु चाल्ने बताए । उनले लुम्बिनी प्रदेश सरकारले सञ्चार विधेयक ल्याएर सञ्चारकर्मीको कलम नै बन्द बनाउन लागेको बताउँदै उक्त वियेधक फिर्ता नलिए आन्दोलन चर्काउने चेतावनी दिए ।
त्यसैगरी नेपाल पत्रकार महासंघ रुपन्देहीका अध्यक्ष रामराज पोखरेलले लुम्बिनी सरकारले ल्याएको सञ्चार विधेयक फिर्ता गराएरै छाड्ने बताएका छन् । उनले पत्रकारीतामा नयाँ पुस्तालाई प्रोत्साहन गर्न विभिन्न तालिमहरु सिर्जना गर्ने प्रतिबद्धता व्यक्त गरे ।
कार्यक्रममा नेपाल पत्रकार महासंघ रुपन्देहीका पूर्व अध्यक्ष शेरबहादुर केसी, राष्ट्रिय दलित पत्रकार संघका केन्द्रीय अध्यक्ष विनोद पहाडी, महासंघ रुपन्देहीका पूर्व उपाध्यक्ष दिनेश पाण्डे, लायन्स क्लब अफ बुटवल सयपत्रीकी पूर्व अध्यक्ष तथा जोन चेयर पर्सन लायन्स कल्पना शिवाकोटी, संस्थापक अध्यक्ष भगवती पाण्डे लगाएतले मन्तव्य राखेका थिए ।
क्रियाशिल पत्रकार महिला रुपन्देहीकी अध्यक्ष कल्पना तिवारीको अध्यक्षता, सचिव बिन्दु भट्टराईको सञ्चालनमा सम्पन्न कार्यक्रमको समापन उपाध्यक्ष किस्मती चौधरीले गरेकी थिईन् ।
