लुदअ कपिलवस्तु, १२ मंसिर
नेपाली कांग्रेस कपिलवस्तुको निर्वाचन आइतबार (आज) भएको छ । शनिबार उम्मेद्वारको मनोनयन दर्ता गरी आइतबार निर्वाचन गर्ने कार्यतालिका बमोजिम ५२ सदस्यीय कार्य समितिको लागि मतदान भएको कांग्रेस कपिलवस्तुले जनाएको छ । जिल्ला सदरमुकाम तौलिहवामा रहेको बुद्धपद्म माविको प्राङ्गमा भएको निर्वाचनमा जिल्ला सभापतिका लागि दुई नेता प्यानल बनाएर चुनाव लडेका छन् । पार्टीका पूर्व जिल्ला सभापति भैसक्नुभएका राजेश आचार्य र वर्तमान जिल्ला उपसभापति अब्दुल कलाम जिल्ला सभापतिको दौडमा रहनुभएको हो । विहान ९ बजेदेखि सुरु भएको मतदान प्रक्रिया साँझ ५ बजेसम्म चलेको थियो ।
कुल १ हजार ८ सय १६ मतदाताले जिल्ला कार्यसमिति निर्माणका लागि मत दिएका छन् । १० पालिका, ६ प्रदेशसभा निर्वाचन क्षेत्र र ३ संघीय निर्वाचन क्षेत्रको नेतृत्व चुनावबाट हुँदै आएको कांग्रेस कपिलवस्तुमा जिल्ला कार्यसमितिका लागि पनि आइतबार निर्वाचन भएको हो । पार्टीको निर्वाचन आयोगका अनुसार कुल मतदाता मध्ये १ हजार ७ सय ६५ मत खसेको छ । ५५ मतदाता भोट दिनका लागि नआएको निर्वाचन आयोगले जनाएको छ । मतपरिणाम कसको पक्षमा आउने हो अहिल्यै भन्न सकिने अवस्था छैन् ।
दुवै प्यानल बीच कडा प्रतिस्पर्धा रहेको कारण यसले जित्छ भनेर भन्न सकिने अवस्था आएको हो । यद्यपि दुवै पक्षका उम्मेद्वार जित आ–आफ्नो हुने दाबी भने गर्दै आएका छन् । जिल्लामा रामचन्द्र पौडेल पक्ष बलियो देखिन्छ । यद्यपि प्रदेश र प्रतिनिधिसभाका क्षेत्रीय अधिवेशनको नतिजा फरक फरक आउदा पौडेल पक्ष जिल्ला अधिवेशनमा ढुक्क हुन सकेको छैन् ।
शेरबहादुर देउवा पक्ष भने यसभन्दा अगाडी सकिएका निर्वाचन परिणामले खुसी देखिएको छ । सभापतिका उम्मेद्वार आचार्यलाई संस्थापन पक्षका नेताहरु अभिषेक प्रताप शाह, बिरेन्द्र कनौडिया, दीर्घ नारायण पाण्डेय, दीप कुमार उपाध्याय सहीत सुधाकर पाण्डेयले साथ दिएका छन् । उता खाँलाई बर्तमान पार्टी सभापति सुरेन्द्रराज आचार्य, पार्टीका केन्द्रिय सदस्य अतहर कमाल मुसलमान, बैकल्पिक केन्द्रिय सदस्य राजेश सिंहको साथ छ ।
आचार्यको प्यानलमा उप–सभापतिमा राम आशिष पाण्डेय, पदम खनाल, सचिवहरुमा सर्जु थारु र माधव पराजुली र सह–सचिवमा मोहोम्मद वजी अर्सद र राम चरित्र मौर्या रहेका छन् । यस्तै खाँको प्यानलमा उप–सभापतिमा हुुमकान्त खनाल र रजत आचार्य, सचिवमा शक्ति सिंह ठकुरी र प्रेम रायमाझी तथा सह–सचिवमा बिन बहादुर बन्जाडे र बिरेन्द्र शुक्ला रहेका छन् । २ वटा उप–सभापतिका लागि ५ जना, २ वटा सचिवका लागि ४ जना र २ सह–सचिवका लागि ५ जनाको उम्मेद्वारी परेको छ । मतदान सकिएसंगै राति ९ बजेदेखि जिल्ला पार्टी कार्यालयमा मतगणना थालिने निर्वाचन आयोगले जनाएको छ । आइतबार रातिसम्म नतिजा आउने विश्वास लिइएको छ ।
