लुदअ कपिलवस्तु, फागुन ७
प्रधानमन्त्री केपी ओलीको शिफारिसमा पुष ५ गते गरिएको प्रतिनिधि सभा विघटनको विरुद्धमा आ–आफ्नै तरिकाले विरोध र प्रर्दशन गरिरहेका कपिलवस्तुका राजनितिक दलहरुले संयुक्त आन्दोलनको सहमति गरेका छन् । देशभर अलग अलग विरोध र प्रर्दशन भईरहेका बेला कपिलवस्तुमा पहिलो पटक जिल्लामा विद्यमान पाँच राजनितिक दलहरुले शुक्रबार संयुक्त संघर्ष गर्ने सहमति गरेका हुन् । कपिलवस्तुको बैरिया स्थित मायादेवी रिर्साेटमा बसेको संयुक्त बैठकले नेकपा माओवादी क्रान्तिकारी, राष्ट्रिय जनमुक्ति पार्टी लगाएतका साना राजनैतिक घटकहरुलाई पनि संयुक्त आन्दोलनमा सहभागि हुन अपिल गरेको छ ।
प्रतिनिधि सभा विघटन विरुद्ध नेपालमै पहिलो पटक प्रजातन्त्र दिवसको अवसर पारेर कपिलवस्तुबाट संयुक्त संघर्ष समिति गठन गर्दै नेपाल कम्युनिष्ट पार्टी (नेकपा) प्रचण्ड–माधव समुह, नेपाली कांग्रेस, जनता समाजवादी पार्टी नेपाल, राष्ट्रिय जनमोर्चा र नेकपा मसालले सहमति गरेका हुन । जिल्लाका मुख्य पाँच दलको बैठकले प्रधानमन्त्री र राष्ट्रपतिको असंवैधानिक तथा अलोकतान्त्रिक ढङ्गले संघिय संसद बिघठनका बिरुद्ध सयुक्त संघर्ष गर्ने निर्णय गरेको जसपा केन्द्रिय सदस्य नारायण खनालले बताउनुभएको छ ।
त्यस्तै सो समुहले फाल्गुन १० गते जिल्लाको सदरमुकाम तौलिहवामा प्रतिगमन बिरुद्धको बृहत अन्तरक्रिया गर्ने पनि निर्णय गरेको छ । सरकारले असंबैधानिक रुपमा रुपमा संसद विगठन गरेको भन्दै यसका विरुद्ध कपिलवस्तुका राजनैतिक दल एकढिक्का भए पछि जिल्लामा प्रधानमन्त्री ओली निकटका नेकपा नेताहरु एक्लै जस्तै भएका छन् । आज गठित संयुक्त संघर्ष समितिका कारण ओली समुलाई थप चुनौति पर्ने देखिएको छ । बैठकमा सहभागित राजनैतिक दलका नेतहरुले संसद पुर्नस्थानाको विकल्प नभएको बताएका छन् ।
बैठकमा (नेकपा) जिल्ला अध्यक्ष विष्णु पन्थी, नेपाली कांग्रेस महासमिती सदस्य दुर्गा बहादुर सेन, जनता समाजवादी पार्टी नेपालका केन्द्रीय सदस्य विष्णुहरि शर्मा, केन्द्रीय सदस्य नारायण खनाल, अखिल नेपाल किसान महासंघ केन्द्रीय उपाध्यक्ष शिव पौडेल, राष्ट्रिय जनमोर्चाका जिल्ला अध्यक्ष दधिराम आचार्य, नेकपा मसालका जिल्ला प्रवक्ता छविलाल गैरेले प्रधानमन्त्री ओलीले संसद विगठन गरी संबिधान र त्यसले अंगिकार गरेका प्रणालीमाथि प्रहार गरेको भन्दै सोही कारण देशमा राजनैतिक र संवैधानिक संकट निम्त्याएको बताउनुभयो ।
संयुक्त संघर्षको विकल्प नरहेको जनाउँदै बैठकमा सहभागी नेताहरुले कपिलवस्तुले त्यसको सुरुवात गरेको बताएका छन । यसका साथै सर्वदलिय बैठकले एक संयुक्त विज्ञप्ती जारी गर्दै सरकारको प्रतिगमन र असंबैधानिक कदमप्रति संयुक्त संघर्ष गर्ने जनाएको छ । नेकपा जिल्ला अध्यक्ष विष्णु पन्थी, नेपाली कांग्रेस महा समिती सदस्य दुर्गा बहादुर सेन, जनता समाजवादी पार्टी जिल्ला अध्यक्षद्धोय कैलाश अग्रहरी, शैलेन्द्र यादव, राष्ट्रिय जनमोर्चा जिल्ला अध्यक्ष दधिराम आचार्य र नेकपा मसालका जिल्ला प्रवक्ता छबिलाल गैरेद्धारा जारी संयुक्त विज्ञप्तीमा सरकारले संसद विगठन गरेर असंबैधानिक कदम चालेको भन्दै यसका विरुद्ध संयुक्त आन्दोलन गर्ने उल्लेख छ ।
