हरि आचार्य, कपिलवस्तु
कपिलवस्तुको बाणगंगा नगरपालिका १ उत्तमनगरमा रहेको दलित सामुदायिक भवनको मुल प्रवेशद्धारको शिलान्यास गरिएको छ । बाणगंगा नगरपालिकाका कार्यपालिका सदस्य पुर्णकला सुनार, कृष्ण बहादुर विक, योगनाथ सुनारले संयुक्त रुपमा शिलान्यास गर्नुभएको हो ।
दलित समुदायका लक्षित सम्पुर्ण कार्यक्रम सम्पन्न तथा हरेक गतिविधि सञ्चालन भईरहेको उक्त भवनको मुल प्रवेशद्धारको ५७ औँ अन्तर्राष्ट्रिय जातीय विभेद उन्मूलन दिवसकये अवसर पारी शिलान्यास गरिएको मुल प्रवेशद्धार निर्माण उपभोक्ता समितिका अध्यक्ष टिका सुनारले जानकारी दिनुभयो । भवनको सुरक्षाका लागि मुल गेट अत्यावश्यक भएकाले निर्माण कार्यमा लागिहाल्ने उपभोक्ता समितिले जनाएको छ ।
दलित अधिकारकर्मी समेत रहनुभएका सुनारले अन्तर्राष्ट्रिय जातीय विभेद उन्मूलन दिवसको अवसरमा शुभकामना व्यक्त गर्दै दलित र बहिष्करणमा परेका समुदायको हकअधिकार संरक्षण र संवर्द्धनका लागि राष्ट्रिय दलित आयोग र समावेशी आयोगजस्ता छुट्टै स्वतन्त्र र अधिकार सम्पन्न संवैधानिक निकायको स्थापना भए पनि वास्तविक पीडितले अझै न्याय पाउन नसकिरहेको बताउनुभयो ।
दलित अधिकारकर्मी मनोज नेपाली, दिल बहादुर खाती, ज्ञान बहादुर नेपाली, सञ्चारकर्मी राम बहादु गन्धर्व, चर्चित गायक तथा दलित अभियान्ता दिनेश रञ्जन, रघुनाथ विक लगायत समाजसेवी तथा अन्य दलित अगुवाहरुको उपस्थिती, दलित अधिकारकर्मी तथा सञ्चारकर्मी पुर्ण चन्द्र परियारको सञ्चालनमा शिलान्यास कार्यक्रम सम्पन्न भएको हो ।
