लुदअ, कपिलवस्तु
कपिलवस्तुको कृष्णनगर नगरपालिकामा लोकतान्त्रिक समाजवादी पार्टी लोसपाबाट मेयर र उपमेयर दुवैमा पुरुषको मनोनयन दर्ता भएको भन्दै निर्वाचन आयोगले दुवै जनाको उम्मेदवारी रद्ध गरेको छ । कृष्णनगर नगरपालिकाको मेयरमा लोसपाबाट मेयरमा शिवप्रसाद कलवार र उपमेयरमा मोहम्मद अफजल मियाले उम्मेदवारी दिएका थिए । कानून अनुसार मेयर उपमेयर पदमा उम्मेदवारी दिने दलले एक महिला र एक पुरुष उठाउनु पर्ने भए पनि दुवै पदमा पुरुषले उम्मेदवारी दिएकाले उम्मेदवारी खारेज गरेको जिल्ला निर्वाचन कार्यालय कपिलवस्तुकी सूचना अधिकारी अनिता क्षेत्रीले जानकारी दिइन् । त्यसैगरि कृष्णनगरमै दलित प्रमाणपत्र पेश गर्न नसकेका कारण वडा नम्बर ९ मा माओवादीबाट दलित महिला सदस्यको उम्मेदवार बनेकी सनिरा धोवी र जनता प्रगतिशील पार्टीकी सुमिरता रैदासको उम्मेदवारी रद्द भएको छ ।
मायादेवी गाउँपालिका वडा नम्बर ३ का जसपाका वडा अध्यक्ष पदका उम्मेदवार रामनाथ यादवको उम्मेदवारी रद्द भएको छ । एकै पदमा सोहि पार्टीबाट दुई जनाले उम्मेदवारी दिएको पाइएपछि पछि नाम दर्ता गरेका यादवको उम्मेदवारी खारेज भएको हो । मायादेवी गाँउपालिकाको वडा नम्बर ५ मा जसपाकै महिला सदस्य पदकी उम्मेदवार रामरती अहिरले जनप्रतिनिधिबाट राजिनामा नदिइ मनोनयन दर्ता गरेका कारण उनको उम्मेदवारी पनि खारेज भएको हो । बिजयनगर गाउँपालिकामा सबै भन्दा बढि ८ जनाको उम्मेदवारी खारेज भएको छ । वडा नम्बर ६ का जनता प्रगतिशील पार्टीबाट वडा अध्यक्षका उम्मेदवार उदितकुमार मिश्रा, वडा नम्बर ३ मा नेकपा माओवादी केन्द्रकी महिला सदस्य साधना केवट, वडा नम्बर ५ मा जनमोर्चाकी महिला सदस्य पदकी उम्मेदवार सुनिता चौधरी कुर्मी, वडा नम्बर १ मा महिला सदस्य पदकी बहुजन शक्ति पार्टीकी उम्मेदवार सुशीला चौधरीको उम्मेदवारी खारेज भएको छ ।
यस्तै वडा नम्बर ७ का राष्ट्रिय जनमोर्चाका वडा सदस्य उम्मेदवार बालजी कोरी, वडा नम्बर ४ मा राप्रपाकी दलित महिला सदस्य पदकी उम्मेदवार जमुना घर्ति, वडा नम्बर ३ का जनता प्रगतिशील पार्टीका सदस्य पदका उम्मेदवार साहिद पठान र सोहि पार्टीकै वडा नम्बर ६ मा महिला सदस्य पदकी उम्मेदवार रेश्मा चौहानको उम्मेदवारी खारेज भएको सुचना अधिकारी क्षेत्रीले जनकारी दिईन् । कपिलवस्तुका १० वटा स्थानीय तहमा कुल ३ हजार ५ सय ८२ जनाले उम्मेदवारी दिएका थिए ।
