लुदस,कपिलवस्तु । नेकपा (एमाले) को तर्फबाट शुद्धोधन गाउँपालिकाका अध्यक्षका प्रत्यासी बिनोद चौधरीले कृषिमा आधारित उद्योगलाई प्राथमिकता दिने बताएका छन् । यो पटकको चुनावमा बावुवाद नहेरी जनताले कामको आधारमा आफ्नो पार्टीलाई विजयी गराउनेमा उनी बिश्वस्त छन् । गाउँपालिका अध्यक्षका प्रत्यासी चौधरीले मधेशी समुदायमा अहिले पनि ब्याप्त बावुवादको विपक्षमा जनादेश आउने कुरामा आफु विश्वस्त रहेको दावी गरेका छन्।
अध्यक्षका प्रत्यासी चौधरीले केपि ओली सरकारले गरेका भौतिक पूर्वाधार विकास, शिक्षा, स्वास्थ्य, सिमा सुरक्षा, राष्ट्रियता स्वाधिनता जस्ता महत्वपूर्ण कामका कारण शुद्धोधनका जनताले एमालेलाई रोज्ने दावी गरेका छन् । अध्यक्षका प्रत्यासी चौधरीले गाउँपालिका कार्यालयसँग सबै सहायक सडक जोडदै कालोपत्रे गर्ने प्रतिवद्धता ब्यक्त गरेका छन्। चौधरीले एमाले सरकारले नेपाललाई अन्तराष्ट्रिय स्तरमा उच्च छविका साथ चिनाएको जिकिर गर्दै आफ्नो पार्टीले शुद्धोधन गाउँपालिकामा विजयी भएमा कृषिमा आधारित उद्योगलाई प्रोत्साहन गर्ने , युवाहरुलाई रोजगारीसँग जोडने, सडक संजाल विस्तार गर्ने जस्ता कार्यहरुलाई प्रभावकारी कार्यान्वयन गर्ने बताएका छन् ।
चौधरीले स्पष्ट विकास प्रतिको दृष्ट्रिकोणका कारण शुद्धोधनमा एमालेले बहुमतका साथ विजय प्राप्त गर्ने दावी गरेका छन्। त्यस्तै गाउँपालिका उपाध्यक्षकी प्रत्यासी जलिमुन्निसा मुसलमानले समुदायमा महिलाहरु माथि थुुप्रै विभेद रहेको चर्चा गर्दै विभेदका विरुद्ध आफुले नेतृत्वदायी भूमिका निर्वाह गर्ने बताए । उपाध्यक्षकी प्रत्यासी जलिमुन्निसा मुसलमानले समुदायका विपन्न बालबालिका, हिंसा पिडित महिला र वृद्धका लागि एमालेले विशेष प्याकेज ल्याउने प्रतिबद्धता व्यक्त गरेकी छन् ।
