लुदस, जीतपुर
कपिलवस्तुको बाणगंगा नगरपालिका–६ अन्तर्गत रहेको लक्ष्मणघाट सामुदायिक वन उपभोक्ता समिति र कोईलीचौर सामुदायिक वन उपभोक्ता समितिले लक्ष्मणघाट समशानघाट परिसरलाई हराभरा तथा धार्मिक महत्वको क्षेत्रका रूपमा विकास गर्ने उद्देश्यले वृक्षारोपण अभियान सञ्चालन गरेका छन्।
समशानघाट वरिपरि रहेको खाली सार्वजनिक जग्गालाई भविष्यमा हरियाली हरित पार्क का रूपमा विकास गर्ने दीर्घकालीन लक्ष्यसहित बोधी, कल्पवृक्ष, रक्तचन्दन, अशोक, रुद्राक्ष, बेल, चाइना डल लगायत धार्मिक, वातावरणीय तथा औषधीय महत्व बोकेका विभिन्न प्रजातिका बिरुवा रोपिएका हुन्।
लक्ष्मणघाट सामुदायिक वन उपभोक्ता समितिका अध्यक्ष खड्ग बहादुर थापाका अनुसार समशानघाटलाई अन्त्येष्टि स्थलमा सीमित नराखी प्राकृतिक सौन्दर्य, धार्मिक आस्था तथा वातावरण संरक्षणलाई जोड्ने नमुना क्षेत्रका रूपमा विकास गर्ने योजना बनाइएको बताए । वृक्षहरू हुर्किएसँगै यो क्षेत्र श्रद्धाञ्जली अर्पण, ध्यान, विश्राम तथा हरियाली वातावरणको अनुभूति गर्न सकिने आकर्षक स्थलका रूपमा स्थापित हुने विश्वास गरिएको छ ।
वृक्षारोपण कार्यक्रममा सव डिभिजन वन कार्यालय मोतिपुरका प्रमुख एजाज अन्सारी, बाणगंगा नगरपालिका–५ का वडाध्यक्ष दुनिका भुषाल, वडा नं. ६ का वडाध्यक्ष करुण टण्डन, स्थानीय समाजसेवी, बुद्धिजीवी, सामुदायिक वनका पदाधिकारी तथा उपभोक्ताहरूको उल्लेखनीय सहभागिता रहेको थियो।
सहभागीहरूले वातावरण संरक्षण, जैविक विविधताको प्रवद्र्धन तथा धार्मिक महत्वका बिरुवाको संरक्षण आजको आवश्यकता भएको उल्लेख गर्दै यस्ता अभियानले समुदायमा हरियाली विस्तारका साथै वातावरणीय चेतना अभिवृद्धि गर्न महत्वपूर्ण भूमिका खेल्ने विश्वास व्यक्त गरेका छन्।
स्थानीयवासीहरूले पनि यस अभियानको प्रशंसा गर्दै समशानघाटलाई व्यवस्थित, स्वच्छ र हराभरा बनाउने प्रयासले भावी पुस्तालाई वातावरण संरक्षणको सकारात्मक सन्देश दिने बताएका छन्। समितिहरूले आगामी दिनमा समेत यस्ता संरक्षणमुखी कार्यक्रमलाई निरन्तरता दिँदै लक्ष्मणघाट क्षेत्रलाई हरित तथा धार्मिक पर्यटनको सम्भावना बोकेको नमुना स्थलका रूपमा विकास गर्ने लक्ष्य लिएका छन्।
