परासी, १० जेठ ः
निषेधाज्ञाका कारण रासायनिक मल वितरण हुन नसक्दा पश्चिम नवलपरासीका किसानहरु मर्कामा परेका छन् । जसका कारण धानको बिउ राखेका किसानहरु चिन्तित बनेका छन् । अहिले जिल्लाका सबैजसो किसानहरुले धानको बिउ राखि सकेका छन् ।
५÷७ दिनभित्र मल नपाए बिउ हुर्किन नपाउने र उत्पादनमा समेत कमि आउने किसानहरुको भनाई छ । जिल्लाको २९ हजार ९ सय ७५ हेक्टर क्षेत्रफलमा धान खेति हुँदै आएको छ । जसमध्ये ८० देखि ९० प्रतिशत किसानले धानको बिउ राखिसकेको कृषि ज्ञान केन्द्रकी कृषि प्रसारक अधिकृत एंव सूचना अधिकारी मनिषा पौडेलले जानकारी दिईन् । समयमा मल नपाएर स्वतः उत्पादनमा कमि आउने उनको भनाई छ । किसानहरुलाई अहिले डिएपी मलको आवश्यक छ ।
प्रयाप्त नभएपनि तत्कालका लागि किसानहरुलाई आवश्यक पर्ने मल रहेको र निषेधाज्ञाले वितरण गर्न नसकिएको कृषि सामाग्री कम्पनी लि. परासी शाखाका प्रमुख खडानन्द बञ्जाडेले बताए । जिल्ला प्रशासनले जेठ १५ गतेसम्मका लागि निषेधाज्ञा लगाएको छ । कम्पनीसँग अहिले ६ सय टन डिएपी र साढे ५ सय टन युरिया मल छ । बैंकहरु बन्द भएकाले रकम जम्मा गर्न नसक्ने अवस्था छ । त्यसैगरी मल वितरण गर्दा किसानहरुको भिड बढ्ने र कोरोना संक्रमण फैलिन सक्ने भएकाले पनि समस्या आएको बञ्जाडेको भनाई छ । निषेधाज्ञा अवधिभर मल वितरण गर्ने अवस्था नरहेको र त्यसपछि प्रशासनको अनुमतिमा मल वितरणको व्यवस्था गर्न सकिने बञ्जाडेको भनाई छ ।
किसानहरुलाई बिउ र मल लैजानका लागि रोक तोक नगरिएको प्रमुख जिल्ला अधिकारी धर्मेन्द्र मिश्रले बताए । सुरक्षित तरिकाले मल वितरणका लागि छलफल गरी किसानहरुको समस्या समाधानतर्फ लाग्ने प्रजिअ मिश्रको भनाई छ ।