हरि शर्मा
परासी, ५ असार ः

पश्चिम नवलपरासीका सीमावर्ती नाकाबाट मटर तस्करी कार्य बढेको छ । जिल्ला प्रहरी कार्यालयले मटर तस्करीमा कडाई गरेपनि सीमावर्ती नाकामा रहेका प्रहरी चौकी र सशस्त्र प्रहरीको मिलमतोमा मटर तस्करी कार्य बढेको पाइएको हो । सीमावर्ती क्षेत्रका भूजहवा, बसैया,जगन्नाथपुर, बिस्नुपुरालगायतका नाकाबाट दिनहुँजसो मटर भारततर्फ तस्करी हुँदै आएको छ । सबैभन्दा बढी बसैया र जगन्नाथपुरबाट जाने गरेको स्थानीयले बताएका छन् । ति नाकाहरुबाट दैनिक ४० देखि ५० पिकअप भेन मटर भारत जाने गरेको छ । उनले नाकाहरुमा पिकअप भेन लैजाने र त्यहाँबाट भारतीय टेक्टर, साइकल र मोटरसाइकलबाट मटर भारततर्फ लैजाने गरेका छन् ।
तेस्रो मुलकबाट आउने हरियो मटर नेपालमा भन्दा भारतमा महङ्गो पर्ने भएकाले तस्करी कार्य बढेको हो । गतवर्ष मटरको तस्करी बढेपछि जिल्लास्थित सुरक्षा समितिको बैठकले कोरोनाको कारण देखाउँदै ओसारपसार गर्ने सवारीसाधनमा रोक लगाएको थियो । त्यसवर्ष मटर ओसारपसारमा प्रतिबन्ध लगाएपछि तस्करहरुको दबाबमा उद्योग वाणिज्य संघकै प्रतिनिधिहरु जिल्ला प्रशासन पुगेर कारोबारलाई सुचारु गर्न आग्रह गरेका थिए । तर प्रशासनले मानेको थिएन । प्रहरीले धमाधम मटर बोकेका गाडी पक्राउ गरेर कारबाही गर्न थालेपछि त्यसबेला एसपी अजय केसीको सरुवा गराउने भन्दै केही कारोबारीहरु लागि परेका थिए । त्यो पनि संभव नदेखेपछि मटरको कारोबार गतवर्ष शुन्य जस्तै भएको थियो । तर अहिले फेरि मटर तस्करी कार्य बढेपछि जिल्लामा प्रहरीको आलोचना बढेको छ ।
सीमा क्षेत्रका नेपाली पसलका गोदाममा राखिएका मटरलाई अबैध भनेर प्रहरी र राजश्व कार्यालयले बरामद गर्न नसक्ने कानुनी झण्झटको फाईदा उठाउँदै तस्करहरुले भारतर्फ तस्करी गर्ने गरेको जिल्ला प्रहरी कार्यालयका उपरीक्षक अजय केसीले बताए । मातहतका प्रहरी चौकीलाई मटर तस्करीलाई नियन्त्रण गर्न कडा निर्देशन दिइएको उनले बताए । चौकीमा जनशक्ति कमी हुने र प्रविधिका कारण पनि तस्करले प्रहरी आएको जानकारी पाएपछि अन्य बाटो प्रयोग गर्ने भएकाले समस्या भएको उनको भनाई छ ।