लुदस,तौलिहवा । सामान्य परिवारमा जन्मिएका कपिलवस्तु नगरपालिका–६ का २७ बर्षीय सुदिप भुसालले जीवनमा सफल हुन धेरै हण्डरहरु बेहोर्नुपर्यो। माध्यमिक तहसम्मको शिक्षा पूरा गरेका भुसालले एसएलसीपछि उच्च शिक्षा अध्ययनका लागी चितवनको अमर उच्च मा.वि. पटेहानीमा २९ महिने कृषि तथा पशु भेटनरी अध्ययन गरेका थिए । उमेरको परिपक्कता सँगै घरको एउटा छोरो भएपछि घर परिवारको जिम्मेवारी उनकै काँधमा आइप¥यो।
अध्ययन सकाए पश्चात् ऋण लिएरै भए पनि व्यवसायिक रुपमा एग्रोभेट पसल खोल्ने योजना बनाए। करिव ४ बर्ष अघि देखी एग्रोभेट पसल खोलेका भुसालले अहिले दुध डेरी संचालनमा ल्याएका छन् । सानै देखी आफुभित्रको श्रम र सीपलाई परिश्रमको मोति मानेर आफ्नै देशमा रोप्न सके स्वदेशमा नै केही गर्न सकिन्छ भन्ने सोंच रहेका भुसाल अहिले आफनै व्यवसयमा व्यस्त रहेका छन् । पसलमा अतिरिक्त किसानहरुको घरमा गएर गाई, भैसी,बाख्रा,कुखुरा लगायतका पशुपन्छीहरुको उपचारमा गर्ने गर्छन् । उनले अहिले मासिक करिव एक लाख सम्म कमाउने गरेका छन् ।
आफु फिल्ड वा बाहिर गएको बेला पसलमा बुवा, आमा र श्रीमतीले सहयोग गर्ने भएको कारण सजिलो भएको उनी बताउँछन् । भुसाल भन्छन् – “पहिला स्वदेशमा व्यवसाय गर्ने आँट थिएन । पछी कृषि तथा पशु भेटनरी पढेर बिभिन्न फर्म तथा स्थानको अध्ययन गरेपछी र घरपरिवार र आफन्तहरुको सल्लाहबाट स्वदेशमा नै केही गर्न सकिन्छ भन्ने आँट आयो । त्यसैले अहिले उनी आफ्नै ठाउँको महत्व र सम्भावना नचिनेर विदेश जान खोज्नेहरुलाई ईच्छा शक्ति भए यही केही गर्न सकिने सुझाव र सल्लाह दिन्छन्।
आर्थिक अभावका कारण विदेशमा पसिना र परिश्रम खर्चेर केही आर्जन गर्न नसकेका र स्वदेशमा मेहनत गरेपछि सफल बनेका धेरै युवकहरु कपिलवस्तुमा अहिले प्रशस्त भेटिन्छन् जो विदेशभन्दा आफ्नै माटोलाई चिन्न सकेमा समृद्ध र उज्यालो भविष्य नेपालमै रहेको सन्देश गर्वका साथ दिइरहेका मात्रै छैनन्, सफल व्यवसाय गरेर त्यसको पुष्टि नै गरिरहेका छन् ।
