थानेश्वर अधिकारी । कपिलवस्तु जिल्लाको बाणगंगा नगरपालिका–६, लक्ष्मणघाट निवासी ३१ वर्षीय प्रकाश घिमिरे विगत तीन वर्षदेखि मेरुदण्डको गम्भीर चोटका कारण थलिएका छन् ।
तीन वर्षअघि खेतमा मलखाद लैजाने क्रममा लड्दा उनको पछाडिको मेरुदण्ड (स्पाइनल कर्ड) मा गम्भीर चोट लागेको थियो । दुर्घटनापछि उनले काठमाडौंमा करिब ३ महिना तथा बुटवलस्थित नवजीवन थेरापी सेन्टरमा १८ महिनासम्म उपचार तथा थेरापी गराएका थिए । चिकित्सकहरूले नियमित थेरापी र थप उपचारबाट स्वास्थ्यमा सुधार आउन सक्ने बताएका छन् ।
हाल प्रकाशको दुवै खुट्टा चल्दैनन् भने हातको चलायमान क्षमता पनि कमजोर रहेको छ । उनी ह्विलचेयरको सहारामा बस्ने गरेका छन् र दैनिक क्रियाकलापका लागि परिवारका सदस्यको सहयोग आवश्यक पर्ने अवस्था रहेको छ । खाना खान, घरभित्र–बाहिर आवतजावत गर्न तथा अन्य सामान्य काम समेत अरूको सहारामा गर्नुपरेको परिवारले जनाएको छ ।
प्रकाशका बुबा रामप्रसाद घिमिरेका अनुसार परिवारको आर्थिक अवस्था कमजोर छ । सामान्य खेतीपाती तथा ज्याला मजदुरीबाट ९ सदस्यीय परिवारको जीविकोपार्जन गर्दै आएका उनीहरूलाई छोराको उपचार खर्च जुटाउन निकै कठिन भएको छ । चिकित्सकहरूले थप उपचारका लागि भारतको बैंगलोर लैजान सुझाव दिए पनि आर्थिक अभावका कारण सम्भव हुन नसकेको उनले बताए ।
प्रकाशको उपचार तथा नियमित थेरापीका लागि आर्थिक सहयोग आवश्यक भएकाले परिवारले सहयोगी मनहरूलाई सहयोग गरिदिन हार्दिक अनुरोध गरेको छ । सहयोग गर्न इच्छुक महानुभावहरूले तल उल्लेखित सम्पर्क नम्बर वा उपलब्ध क्यूआर कोड मार्फत सहयोग गर्न सक्नुहुनेछ ।
सहयोग तथा जानकारीका लागि ः
रामप्रसाद घिमिरे (बुवा)
📞 ९८६७९०७५८५
