तौलिहवा,कपिलवस्तु । विश्व रक्तदाता दिवसको अवसरमा युनिक एग्रो सेन्टर एण्ड रुपक भेट फार्माको आयोजना तथा नेपाल रेडक्रस सोसाइटी, कपिलवस्तुको सहयोगमा नारी शिल्पकला केन्द्र, गौढीचोक तौलिहवामा रक्तदान कार्यक्रम सम्पन्न भएको छ।
सामाजिक उत्तरदायित्व तथा मानवीय सेवाको भावनालाई आत्मसात गर्दै आयोजित उक्त कार्यक्रममा ६४ जना रक्तदाताले रक्तदान गरेका थिए। कार्यक्रमबाट कुल ६४ पोइन्ट रगत संकलन भएको युवा व्यवसायी सुदिप भुसालले जानकारी दिए।
कार्यक्रम युनिक एग्रो सेन्टर एण्ड रुपक भेट फार्माका सञ्चालक रुपक गुप्ताको अध्यक्षतामा तथा सुदिप भुसालको सञ्चालनमा सम्पन्न भएको थियो।
कार्यक्रममा पूर्व वडाध्यक्ष रामभजन कलवार, मोहित मिश्र, युवा व्यवसायी वसन्त सुवेदी लगायत विभिन्न क्षेत्रका व्यक्तित्वहरूको उल्लेखनीय उपस्थिति रहेको थियो।
आयोजकले रक्तदानलाई जीवनदानको अभियानका रूपमा निरन्तर अगाडि बढाउँदै समाजमा रक्त अभाव न्यूनीकरण गर्न यस्ता कार्यक्रमले महत्वपूर्ण योगदान पुर्याउने विश्वास व्यक्त गरेका छन्।
