लुदस, तौलिहवा ।
कपिलवस्तु नगरपालिकाका वडा नम्बर ६ र ११ लाई एकै समारोहबीच बालमैत्री वडा घोषणा गरिएको छ। तिलौराकोट माध्यमिक विद्यालयमा आयोजित कार्यक्रममा जिल्ला समन्वय समितिका प्रमुख बावुराम आचार्यले दुवै वडालाई बालमैत्री घोषणा गरेका हुन्।

बालमैत्री स्थानीय शासन कार्यान्वयन निर्देशिका–२०७८ र कार्यविधि–२०७९ अनुसार ५१ वटा सूचक पूरा गरेपछि वडा नम्बर ६ र ११ लाई बालमैत्री घोषणा गरिएको नगरपालिकाका सामाजिक विकास अधिकृत पदमराज श्रेष्ठले जानकारी दिए।

कार्यक्रममा नगर प्रमुख सुदीप पौडेल, प्रमुख जिल्ला अधिकारी जर्नादन गौतम तथा वडा नं. ११ का अध्यक्ष रामगोपाल यादवले बालअधिकार, शिक्षा, स्वास्थ्य र बालमैत्री वातावरणलाई दिगो बनाउँदै नगरपालिकाभरि अभियान विस्तार गरिने बताएका थिए।