कपिलवस्तु । नेकपा एमाले जिल्ला कमिटी कपिलवस्तुको सातौँ विस्तारित बैठक तथा ‘मिसन पार्टी जागरण अभियान’ अभिमुखीकरण कार्यक्रम बुद्धभूमि नगरपालिकामा सम्पन्न भएको छ।
कार्यक्रममा एमालेका केन्द्रीय तथा प्रदेश तहका नेताहरूले पार्टीलाई विधि, नीति र प्रणाली अनुसार सञ्चालन गर्दै संगठनलाई थप सुदृढ र आगामी निर्वाचनका लागि प्रभावकारी बनाउनुपर्नेमा जोड दिएका छन्।
अभियानलाई प्रभावकारी बनाउन कपिलवस्तुका १० वटै स्थानीय तहका पालिका तथा वडा कमिटीमा जिम्मेवारी बाँडफाँड गरिएको जिल्ला कमिटी सचिव चन्द्रबहादुर गहतराजले जानकारी दिए।
कार्यक्रममा एमाले केन्द्रीय कमिटी सचिव छविलाल विश्वकर्माले पार्टी सामूहिक भावना र प्रणालीअनुसार अघि बढ्नुपर्ने बताए। सिद्धान्तलाई व्यवहारमा कार्यान्वयन गर्दै जनतासँगको सम्बन्ध मजबुत बनाउनुपर्नेमा उनले जोड दिए।
केन्द्रीय कमिटी सदस्य गिरधारीलाल न्यौपानेले पार्टी विभाजनतर्फ जान नहुने भन्दै नेता–कार्यकर्ता एकताबद्ध भएर संगठनलाई अझ बलियो बनाउनुपर्ने बताए।
लुम्बिनी प्रदेश अध्यक्ष राधाकृष्ण कँडेलले पार्टीभित्रका कमजोरीको समीक्षा गर्दै सुधारका लागि अघि बढ्नुपर्ने बताए। ‘मिसन पार्टी जागरण अभियान’को उद्देश्य पार्टीभित्र देखिएको निराशा चिर्दै नेता–कार्यकर्तामा नयाँ ऊर्जा र उत्साह पैदा गर्नु रहेको उनको भनाइ थियो।
त्यस्तै, एमाले कपिलवस्तुका जिल्ला अध्यक्ष बाबुराम खनालले संगठनलाई थप सुदृढ बनाउन एकता, अनुशासन र जिम्मेवारीबोध आवश्यक रहेको बताए।
कार्यक्रममा जिल्ला कमिटीका पदाधिकारी तथा सदस्यसहित विभिन्न तहका नेता–कार्यकर्ताको सहभागिता रहेको थियो।
