तौलिहवा । युनिक एग्रो सेन्टर तथा रुपक भेट फर्माको सहयोगमा कपिलवस्तु नगरपालिका–१०, बिर्तास्थित मदरसा बहरुम उलुममा अध्ययनरत ११७ जना बालबालिकालाई शैक्षिक झोला वितरण गरिएको छ।
बालबालिकाको शैक्षिक यात्रालाई थप सहज बनाउने उद्देश्यले आयोजित कार्यक्रममा युनिक एग्रो सेन्टर तथा रुपक भेट फर्माका सञ्चालक एवं कार्यक्रमका प्रमुख अतिथि रुपक गुप्ताले विद्यार्थीहरूलाई शैक्षिक झोला वितरण गरेका हुन्।
कार्यक्रममा बोल्दै सञ्चालक गुप्ताले आफूमा सानै उमेरदेखि सामाजिक सेवा गर्ने भावना रहेको बताउँदै यही भावनाअनुरूप बालबालिकालाई सहयोग गरेको उल्लेख गरे। आफू विगतदेखि नै विभिन्न सामाजिक कार्यमा सक्रिय रहँदै आएको बताउँदै उनले आगामी दिनमा पनि सामाजिक उत्तरदायित्वका कार्यलाई निरन्तरता दिने प्रतिबद्धता व्यक्त गरे।
उनले कार्यक्रम सफल बनाउन प्रत्यक्ष तथा अप्रत्यक्ष रूपमा सहयोग पुर्याउने सम्पूर्ण सहयोगीप्रति धन्यवाद तथा आभार व्यक्त गरे।
कार्यक्रममा मदरसामा कार्यरत शिक्षक, मौलाना अभिभावकको सहभागिता रहेको थियो। शैक्षिक झोला प्राप्त गरेपछि विद्यार्थीहरूमा उत्साह थपिएको आयोजकले जनाएको छ ।
बालबालिकाको शिक्षामा सहयोग पुर्याउने यस्ता सामाजिक कार्यले विद्यार्थीहरूको मनोबल बढाउनुका साथै शिक्षाप्रतिको रुचि अभिवृद्धि गर्न सकारात्मक योगदान पुर्याउने विश्वास गरिएको छ।
