हरि आचार्य कपिलवस्तु, वैशाख ६
विहिबारदेखि नगरका सीमा क्षेत्रमा अन्य देशका मानिस, तरकारी, फलफुलमा प्रतिबन्ध लगाएपनि रातीको समयमा भने यसको उल्लघंन भएको पाईएको छ । कपिलवस्तुको वाणगंगा नगरपालिका र कपिलवस्तु उद्योग बाणिज्य संघले संयुक्तरुपमा शुक्रबारदेखि बजार अनुगमनमा तिव्रता दिएसँगै नगरभित्र अनुगमन गर्दा सीमा नाकाबाट भारतीय तरकारी, फलफूल सहितका सवारी साधनहरु चारनम्बर भित्रिएको स्थानीयले बताएका छन् । नगरपालिका भित्रका केही फलफूल तथा तरकारी पसलहरुले फोन गरेर भारतीय तरकारी र फलफुल खरिद गरेको पाइएको हो । नगरपालिकाले यस्तो सूचना पाए लगत्तै सोही स्थानमा अनुगमन गर्दा नेपाली नम्बर प्लेटका मोटरसाईकलमा भारतीय तरकारीहरु भित्रिएको पाएपछि ती व्यक्तिहरुलाई आगामी दिनमा नियम उल्लघन गरेमा पक्राउ गरी कडा भन्दा कडा कारबाही गर्ने जनाएको छ ।
शनिवार भक्तौली, राजापानी, बरवा, प्रगतिनगर, मेचकुरी, ओदारी, चारनम्बर, बोडगाउँ, बनगार्इ, मोतीपुर, जिनुवा, भर्लावास लगायतका स्थानमा अनुगमन गरिएको छ । अनुगमनका क्रममा केही पसलहरुमा कालोबजारी भएको पाईएकाले एक पटकलाई सुधार गर्ने मौका दिइएको र पटकपटक गरिएको थाहा पाएमा पसल नै शिलबन्दी गर्ने नगरपालिकाले चेतावनी दिएको छ । यो लकडाउनको विषम परिस्थितीमा यदि कसैले कालोबजारी तथा कृत्रिम अभाव गरेमा तुरुन्तै नगरपालिका अथवा कपिलवस्तु उद्योग बाणिज्य संघमा जानकारी गराउन सबैलाई अनुरोध गरिएको छ ।
अत्यावश्यक वस्तु तथा दैनिक उपभोग्य खाद्य वस्तु विक्रि वितरणका लागि विहान १० बजेसम्म पसलहरु संचालन गर्न नगरपालिकाले व्यापरिहरुलाई जानकारि गराएको थियो । सोहि जानकारी पछि गरिएको अनुगमनका क्रममा धेरै व्यापारिहरुले नगरपालिकोे निर्णय कार्यान्वयन गरेको पाइएको छ । कालोबजारी हुन थाल्यो भन्ने जन गुनासो आउन थाले पछि बिहान ७ बजे देखि १० बजेसम्मको समयमा खोलिएका पसलहरुको अनुगमन गरिएको हो । त्यस्तै बिहान १० बजे पछाडिको समयमा पसल बन्द गर्ने भन्ने नगरपालिकाको निर्णय कत्तिको कार्यान्वयन भएको छ भनेर अनुगमन भएको बताइएको छ ।
यस्तै नगर र उद्योग बाणिज्य संघले दैनिक खाद्य तथा उपभोग्य वस्तु अभाव हुन नदिन पसलेहरुलाई आग्रह गरिएको अध्यक्ष उमानाथ पौडेलले बताए । उपभोक्ताले निर्धारीत समयमा आफुलाई चाहिएको सामान खरिद गर्न सक्ने समेत स्पष्ट पारेका छन् ।
अनुगमनमा नगर उपप्रमुख चक्रपाणी अर्याल, कपिलवस्तु उद्योग बाणिज्य संघका अध्यक्ष उमानाथ पौडेल, उपभोक्ता हित संरक्षण समितिका अध्यक्ष भेषराज पाण्डे, समाजसेवी डोलकराम घिमिरे, बाणगंगा यातायात व्यवसायी समितिका अध्यक्ष विष्णु प्रसाद न्यौपाने, पत्रकारको रोहवरमा वाणगंगा अनुगमन गरिएको नगर प्रवक्त विष्णु पौडेलले जानकारी दिएका छन् ।
