कपिलवस्तुको बाणगंगा नगरपालिका–७, मोतिपुरस्थित ससुराली आएका ३४ वर्षीय तुलबहादुर थापा गत असार १२ गते रातिदेखि सम्पर्कविहीन भएका छन्।
रुपन्देहीको कञ्चन गाउँपालिका–३ स्थायी घर भई ताप्लेजुङस्थित एक हाइड्रोपावर आयोजनामा कार्यरत थापा असार १२ गते ससुराली आएका थिए। सोही रातिदेखि उनी बेपत्ता भएको उनका सालो विरेन्द्र विष्टले जानकारी दिएका छन्।
परिवारका अनुसार खोजी गर्ने क्रममा सोही राति करिब २:३० बजे बाणगंगा–७ नजिक रहेको जनसेवा सहकारीको सिसिटिभि क्यामरामा थापा हिँडिरहेको दृश्य कैद भएको पाइएको छ। त्यसयता भने उनको कुनै अत्तोपत्तो लागेको छैन।
घटना भएको भोलिपल्ट अर्थात् असार १३ गते इलाका प्रहरी कार्यालय पिपरामा र असार १७ गते बाणगंगा नगरपालिका वडा नं. ७ को कार्यालयमा निवेदन दर्ता गरिएको विष्टले बताए।
थापाको खोजी कार्यमा सहयोग गरिदिन तथा कतै फेला परेमा नजिकको प्रहरी कार्यालय वा बाणगंगा नगरपालिका–७, मोतिपुरमा सम्पर्क गरिदिन उनका सालो विरेन्द्र विष्टले सबैमा आग्रह गरेका छन्।
