लुदअ कपिलबस्तु, पौष २
राष्ट्रलाई समृद्ध बनाउने दायित्व अब सबै जिम्मेवार नागरिकको काधमा आएको राष्ट्रिय सभा सदस्य विमला घिमिरेले बताउनुभएको छ । उहाँले कृषक वर्गले आफ्नो आयआर्जन बृद्धि गर्दै आर्थिक रुपमा समृद्ध भए मात्र देश समृद्ध हुने बताउनुभयो । साना किसान कृषि सहकारी संस्था लिमिटेड मोतिपुर शाखाको २२ औ साधारण सभामा प्रमुख अतिथीको रुपमा बोल्दै उहाले यस्तो बताउनुभएको हो ।

यस्तै कार्यक्रममा विशिष्ट अथितीको रुपमा बोल्दै प्रदेश सांसद विष्णु पन्थीले कृषिमा आधुनिकिकरण नहुदा सम्म किसानको आर्थिक विकास हुन नसक्ने बताउदै कृषिमा आधुनिकता, व्यवसायिकता र प्रविधिको आवश्यकता रहेको औल्याउनुभयो । नेपालमा कृषिलाई बृद्धि नगर्दा सम्म देशको अर्थतन्त्र आर्थिक विकास हुन नसक्ने बताउदै नेपालको अर्थ व्यवस्थाको मेरुदण्ड कृषिको विकास नै रहेको उहाको भनाई छ ।

संस्थाका प्रबन्धक शालिकराम पौडेलले संस्थाको प्रगति प्रतिवेदन तथा लेखा संयोजक बिष्णु गिरीले आर्थिक प्रतिवेदन प्रस्तुत गर्नुभएको थियो ।
कार्यक्रममा वडा नंं ७ का वडा अध्यक्ष विष्णु गिरी, सानाकिसान विकास वित्तिय संस्था लिमिटेड इलाका कार्यालय बुटवलका अधिकृत राजेश भटटराई लगाएतले बोल्नुभएको थियो । साधारण सभाको अवसरमा सहकारीमा शेयर पुंजी बृद्धि गर्दै १ लाख सम्म पुर्याएका ५ जना शेयर सदस्य त्यस्तै १० जना उत्कृष्ट किसानलाई पुरस्कार प्रदान तथा सम्मान समेत गरिएको थियो । कार्यक्रममा प्रगति प्रतिवेदन तथा आगामी कार्ययोजना संस्थाका अध्यक्ष भिम प्रसाद सापकोटाले प्रस्तुत गर्नुभएको थियो भने लेखा प्रतिवेदन लेखा समिती संयोजक विष्णु गिरीले प्रस्तुत गर्नुभएको थियो । संस्थाका उपाध्यक्ष राधिका पन्तको स्वागत मन्तव्य तथा हरिशंकर पौडेलको संचालनमा सम्पन्न कार्यक्रममा विभिन्न संघ संस्थाका प्रतिनिधी, समाजसेवी बृद्धिजीवी, शेयर सदस्य पत्रकार लगाएतको उपस्थिती रहेको थियो ।