हरि आचार्य, कपिलवस्तु
कपिलवस्तुका दुई पालिकामा भगत सर्वजित सीप विकास कार्यक्रम अन्तर्गत सिलाई कटाई सिप तालिमको उद्घाटन गरिएको छ । स्वदेशी उद्यम र उत्पादन, दिगो औद्योगिक पुनरुत्थान भन्ने मुल नाराका साथ घरेलु तथा साना उद्योग कार्यालयको आयोजनामा जिल्लाका बाणगंगा र बुद्धभूमि नगरपालिकामा उक्त ३ महिने तालिमको उद्घाटन गरिएको हो । बाणगंगाको चार नम्बर जितपुरमा र बुद्धभूमिको गोरुसिंगेमा सञ्चालन हुने उक्त तालिममा १०/१० जना दलित समुदायका प्रशिक्षार्थी सहभागी छन् ।
घरेलु तथा साना उद्योग महासंघका जिल्ला अध्यक्ष फुलकुमारी श्रेष्ठले महिला पुरुषहरु भन्दा कमजोर हुन्छन् भन्ने मान्यतालाई तोड्नका लागि आफै जागरुक हुनुपर्ने बताउनुभयो । दुवै कार्यक्रमका प्रमुख अतिथि समेत रहनुभएकी श्रेष्ठले सीप सानो ठुलो नहुने भन्दै ईच्छा, मेहनतले भर पार्ने बताउनुभयो । उहाँले तालिम लिनका लागि मात्र नभई आगामि दिनमा तालिममा सिकेका सीपबाट उद्यमी बनी रोजगार दिन सक्ने समेत आवश्यक रहेकोमा जोड दिनुभयो ।
घरेलु तथा साना उद्योग कार्यालय कपिलवस्तुका प्रमुख कालिदास बस्यालले यो २१ औँ शताब्दीमा सीप भन्दा ठुलो केही नभएको बताउनुभयो । दुवै कार्यक्रमका अध्यक्ष समेत रहनुभएका बस्यालले विगतमा दिनका पनि अन्य संघ संस्थाले दिएका तालिम भन्दा घरेलु तथा साना उद्योग कार्यालय कपिलवस्तुले प्रदान गरेका तालिम प्रभावकारी रहेको बताउनुभयो । उहाँले ३ महिनाको अवधिमा जति सक्दो प्रशिक्षकबाट ज्ञान प्राप्त गर्न सम्पुर्ण सहभागीहरुलाई आग्रह गर्नुभयो । उहाँले दुवै उद्घाटन कार्यक्रम सफल पार्न सहयोग गर्नुहुने सम्पुर्णलाई आभार व्यक्त गर्दै तालिमको पुर्ण सफलताको शुभकामना व्यक्त गर्नुभयो ।
बाणगंगामा सचालित तालिमको प्रमुख प्रशिक्षकको रुपमा पुर्ण चन्द्र परियार बुद्धभूमिमा सञ्चालित तालिमको प्रमुख प्रशिक्षकको रुपमा नारायण परियार रहनुभएको छ ।
कार्यक्रमलाई सम्बोधन गर्दै दलित संजालका अध्यक्ष टिकाराम सुनारले भगत सर्वजितको बारेमा सहभागीहरुलाई स्पष्ट पार्दै सबै जनाले उत्साहका साथ सीप सिक्न सफल भए उहाँको उच्च सम्मान हुने बताउनुभयो । कार्यक्रमका विशिष्ट अतिथि सुनारले आफु दलित समुदायको पुनरुत्थान अभियानमा लागेको बताउदै तालिम सफलताको शुभकामना व्यक्त गर्नुभयो ।
घरेलु तथा साना उद्योग कार्यालय कपिलवस्तुका प्रमुख कालिदास बस्यालको अध्यक्षता, घरेलु तथा साना उद्योग महासंघका जिल्ला अध्यक्ष फुलकुमारी श्रेष्ठको प्रमुख आतिथ्यता, महिला उद्यम विकास अध्यक्ष लक्ष्मी सारुको बिशिष्ट आतिथ्ता, कार्यालयका लेखा अधिकृत गोबिन्द तेली, उद्यमशील विकास सहजकर्ता बिनय सैनी, कलाकार दिनेश रञ्जन लगायतको आतिथ्यता, घरेलु तथा साना उद्योग कार्यालयका सुचना अधिकृत बिष्ण्ुा प्रसाद पोख्रेलको स्वागत तथा पुर्ण चन्द्र परियारको सञ्चालनमा कार्यक्रम सम्पन्न भएको थियो । तालिममा सहभागी हुन पाउँदा सहभागीहरुले खुसी तथा धन्यवाद व्यक्त गर्दै सक्रियताका साथ सीप सिक्ने बताएका थिए ।
