हरि आचार्य, कपिलवस्तु
पछिल्लो समय जन्म दिनको अवसरमा विभिन्न होटल तथा रेष्टुरेण्टहरुमा फजुल खर्च गर्ने प्रवृति बढिरहेको पाईन्छ । पश्चिमेली संस्कृति अनुसरण गरि जन्म दिनमा केक काट्ने साथीभाईहरुलाई डाक्ने अनि नाँचगान गरी रमाईलो गर्ने प्रचलन पनि नभएको होईन । सोहि क्रममा जन्म दिनमा केक काट्ने, रमाईलो गर्ने जस्ता प्रवृत्तिलाई अन्त्य गर्नका लागि एक जनप्रतिनिधि आफ्नी छोरीको जन्मोत्सवको अवसरमा साधु सन्तहरुलाई भोजन खुवाई उदाहरणिय कार्य गर्नुभएको छ ।
कपिलवस्तुको बाणगंगा नगरपालिका वडा नं. ११ का वडाध्यक्ष सोमनाथ अर्यालले आफ्नी सानी छोरी हार्दिक्ता अर्यालको दोस्रो जन्मोत्सवको अवसरमा वडामा रहेका ६० जना भन्दा बढी साधु सन्तहरुलाई भोजन गराउनुभएको हो ।
वि.स. २०७६ माघ २५ गतेका दिन जन्मिएकी हार्दिक्ताको जन्मोत्सवको अवसरमा बालिकालाई सानै उमेर देखिनै सामाजिक रुपान्तरणको काममा लगाई उनको भबिष्य समुज्ज्वल बनाउने उद्देश्यका साथ यो कार्य गरिएको वडाध्यक्ष अर्यालले बताउनुभयो ।
जन्मोत्सवमा फजुल खर्च गरि बालबालिकाहरुलाई अनेक तरिकाबाट खुसी बनाउने प्रचलन बढिरहेका बेला वडाध्यक्ष अर्यालले गतिलो उदाहरण दिनुभएको छ । उहाँले गत बर्ष पनि छोरीको जन्मोत्सवको अवसरमा विपन्न परिवारको शौचालय निर्माण तथा अन्य सामाजिक कार्य गर्दै आउनुभएको छ । वडाध्यक्ष अर्यालले फजुल खर्च गर्नुको साटो गरिव, विपन्न तथा अशक्तहरुलाई जन्मोत्सवको अवसरमा सक्दो सहयोग गर्न सम्पुर्णलाई आग्रह गर्नुभयो ।
भोजन ग्रहण गरेसंगै साधु सन्तहरुले वडाध्यक्ष अर्याल, छोरी हार्दिक्ता लगायत सम्पुर्ण परिवारलाई आर्शिवाद दिंदै समुज्ज्वल भविष्यको कामना गरेका थिए ।
