केरसिंह अदै, चन्द्रौटा
कपिलवस्तु, राष्ट्रिय जनमोर्चा कपिलवस्तु द्वारा आज चन्द्रौटा मा एक विरोध सभा सम्पन्न भएको छ । राष्ट्रिय जनमोर्चा जिल्ला अध्यक्ष हरि प्रसाद बेल्बासेको अध्यक्षतामा सम्पन्न कार्यक्रममा राष्ट्रिय जनमोर्चा की केन्द्रीय सदस्य र प्रदेश नं. ५ की प्रदेश सभा सदस्य तारा थापाले ,ले कांग्रेस र एमाले मिलनको कारण भुटानी शरणार्थी र गिरिबन्धु काण्ड बन्द भएको दाबी गर्दै भनिन् कि यो देशको लागि राम्रो संकेत होइन।
थापाले नेपालको आम्दानी ९ खर्ब रहेको तथापि बजेट १८ खर्ब विनियोजित गरिएको बताउँदै बाँकी सबै वैदेशिक ऋणको आधारमा विनियोजित गरिएको जानकारी दिइन् । उनले संघीयता पूणर् रूपमा असफल भएको दाबी गर्दै यसलाई सुधार गर्नुपर्ने आवश्यकता औंल्याइन् ।
राष्ट्रिय जनमोर्चाका केन्द्रीय सदस्य राम कुमार क्षेत्रीले कांग्रेस, एमाले र माओवादीका गलत नीतिहरूका कारण देशमा संकट उत्पन्न भएको टिप्पणी गरे। उनले देशमा बेरोजगारी बढ्नु, कलकारखाना ध्वस्त हुनु, महँगी र भ्रष्टाचारको वृद्धि जस्ता समस्याहरूका लागि वर्तमान सत्ताधारीहरूले जवाफ दिनु पर्ने बताए ।
विरोध सभामा अखिल नेपाल किसान संघका केन्द्रीय उपाध्यक्ष शिव पौडेल र कपा मसालका जिल्ला प्रवक्ता माधव भाट क्षेत्रीले पनि सम्बोधन गरेका थिए । शहीदहरूको प्रति एक मिनेट मौन धारण गरिएको थियो ।
कार्यक्रमको सञ्चालन राष्ट्रिय जनमोर्चा जिल्ला सचिव केर सिंह अदैले गरेका थिए भने स्वागत राष्ट्रिय जनमोर्चा जिल्ला कोषाध्यक्ष के हर सिंह पुन मगरले गरेका थिए ।
