लुदस, रामु यादव
कालिका स्वावलम्बन सामाजिक विकास केन्द्र, तौलिहवा कपिलवस्तुको आयोजना तथा शुद्धोधन गाउँ पालिकाबीच पालिका स्तरीय पोषण तथा खाद्य सुरक्षा निर्देशन समिति र सरोकारवालासँगको बैठक सम्पन्न भएको छ।
बैठकमा प्रमुख अतिथि शुद्धोधन पालिका अध्यक्ष कमलेश शरण चौधरीले कुपोषण अन्त्यका लागि साझा प्रयासको महत्त्व औंल्याए। उनले पोषण शिक्षा र सचेतना अभियानलाई प्रभावकारी बनाउने र दुर्गम क्षेत्रका बालबालिकाको स्वास्थ्य सेवामा पहुँच सुधार्ने योजनामा चासो व्यक्त गरे।
अध्यक्ष चौधरीले गाउँपालिकाले नयाँ कार्ययोजनामा पहल गर्ने र विभिन्न सरोकारवालासँग मिलेर काम गर्ने प्रतिबद्धता जनाएको थियो।
कार्यक्रम लबनी स्वास्थ्य चौकीको सभाहलमा सम्पन्न भएको थियो। हेलन केलर इन्टरनेशनलकी सुस्मिता शर्माले पोषणको महत्त्व र बालबालिकामा कुपोषणका कारणहरूबारे छलफल गर्दै, देशको पोषणको अवस्थाबारे जानकारी गराइन्। कार्यक्रममा विभिन्न समूह र सरोकारवालाहरूको सहभागिताले पोषण सुधारका लागि नयाँ योजनाहरू निर्माण गर्न शुद्धोधन गाउँपालिकाले चासो व्यक्त गरेको छ।
बैठकमा कुपोषण अन्त्यका लागि विशेष योजनाहरू अघि सार्ने र पोषण शिक्षा तथा सचेतना अभियानलाई तीव्र बनाउने प्रतिबद्धता व्यक्त गरिएको थियो। साथै, दुर्गम क्षेत्रका बालबालिकालाई लक्षित गर्दै स्वास्थ्य सेवाको पहुँच विस्तार गर्ने योजना पनि प्रस्तुत गरिएको थियो।
कार्यक्रममा शुद्धोधन गाउँ पालिकाका अध्यक्ष कमलेश शरण चौधरी, उपाध्यक्ष होम प्रकाश चौधरी, कालिका स्वावलम्बन सामाजिक विकास केन्द्रका अध्यक्ष मंजित सिंह, वडा अध्यक्षहरू, स्वास्थ्य शाखाका कर्मचारी, स्वास्थ्य चौकी प्रमुख र विभिन्न सरोकारवाला निकायका प्रतिनिधिहरूको उपस्थिति रहेको थियो।
कार्यक्रमको सञ्चालन स्वास्थ्य शाखाका सहायक आदेश कुमार श्रीवास्तवले गरेका थिए, र कार्यक्रममा आगामी कार्ययोजनाबारे पोषणमार्फत जीवन रूपान्तरण कार्यक्रम संयोजक कमला शुक्लाले जानकारी प्रदान गरिन्।
