कपिलवस्तुको मायादेवी गाउँपालिका वडा नम्बर ३ का वडाध्यक्ष शैलेन्द्र यादवले विद्यार्थीहरूलाई न्यानो पोशाक वितरण गरेका छन्। एक विशेष कार्यक्रमका बीच उनले वडा भित्रका विद्यालय तथा मदरसामा अध्ययनरत करिब १५०० विद्यार्थीलाई न्यानो स्वेटर वितरण गरेको जानकारी दिएका छन्।

वडाध्यक्ष यादवका अनुसार आर्थिक वर्ष २०८१/८२ को बजेटबाट वडा भित्रका १ देखि ५ कक्षासम्म अध्ययन गर्ने विद्यार्थीहरूलाई न्यानो पोशाक उपलब्ध गराइएको हो। यस वितरण कार्यक्रमले चिसो मौसममा विद्यार्थीहरूलाई विद्यालय जान सहज बनाउने अपेक्षा गरिएको छ।

कार्यक्रममा वडा सदस्य इन्द थारू, रामवृक्ष यादव, शिव कुमारी रैदास, वडा सचिव नन्दलाल कोहारसहित स्थानीय समाजसेवी तथा बुद्धिजीवीहरूको उपस्थिति रहेको थियो। सहभागीहरूले विद्यार्थीहरूको शैक्षिक वातावरण सुधार्न यस्ता सहयोगात्मक कार्यक्रमहरूलाई निरन्तरता दिनुपर्ने धारणा व्यक्त गरे। स्थानीय तहको सक्रिय सहभागिताले शिक्षाक्षेत्रमा सुधार ल्याउने विश्वास गर्दै, विद्यार्थी तथा अभिभावकहरूले वडा कार्यालयलाई धन्यवाद व्यक्त गरेका छन्।