जितपुर । स्थानीय कला, संस्कृति तथा विद्यार्थीमा रहेको नृत्य प्रतिभालाई उजागर गर्ने उद्देश्यले बाणगङ्गा नगरपालिका–७, घेरवा बनगाईमा आज साझ ६ बजे देखि १० बजे सम्म ‘कपिलवस्तु डान्स च्याम्प’ आयोजना हुँदैछ।
तारापुञ्ज युवा क्लब र रुबी लभ डान्स स्टुडियोको संयुक्त आयोजनामा हुने प्रतियोगितामा विभिन्न विद्यालयबाट छनोट भएर आएका विद्यार्थीबीच फाइनल प्रतिस्पर्धा हुने कार्यक्रम संयोजक एलिस कार्कीले जानकारी दिए।
प्रतियोगिताले विद्यार्थीमा लुकेको नृत्य प्रतिभालाई पहिचान तथा प्रोत्साहन गर्नुका साथै स्थानीय कला र संस्कृतिको संरक्षण एवं प्रवर्द्धनमा योगदान पुर्याउने आयोजकको विश्वास छ।
कार्यक्रममा समीर एण्ड द इको ब्याण्डको विशेष लाइभ सांगीतिक प्रस्तुति समेत रहने संयोजक कार्कीले बताए। नृत्यसँगै सांगीतिक प्रस्तुतिले कार्यक्रमलाई थप मनोरञ्जनात्मक र आकर्षक बनाउने अपेक्षा गरिएको छ।
स्थानीय युवाको कला, सिर्जना र प्रतिभालाई उजागर गर्ने उद्देश्यले आयोजना गरिएको प्रतियोगिताले बाणगङ्गामा सांस्कृतिक गतिविधि तथा युवा सहभागितालाई थप सक्रिय बनाउने आयोजकको भनाइ छ।
कार्यक्रमलाई भव्य र सभ्य रूपमा सम्पन्न गर्न आवश्यक तयारी पूरा गरिएको जनाउँदै तारापुञ्ज युवा क्लबका अध्यक्ष अमृत गिरीले आम जनसमुदायलाई कार्यक्रममा उपस्थित भई कार्यक्रमलाई सफल पार्नका लागि अनुरोध गरेका छन्।
कार्यक्रमको मिडिया पार्टनरका रूपमा लुम्बिनी दर्पण अनलाइन र ई–साझाकुरा डटकम रहेका छन्।
स्थानीय विद्यार्थीको प्रतिभा, युवा ऊर्जा र सांगीतिक प्रस्तुतिको संगम बन्ने अपेक्षा गरिएको ‘कपिलवस्तु डान्स च्याम्प’ आज बाणगङ्गामा विशेष आकर्षणका रूपमा आयोजना हुँदैछ।
