काठमाडौं । खाना पकाउने एलपी ग्यासको सिलिन्डर साटफेर गर्दा उपभोक्ताले झेल्दै आएको समस्या समाधान गर्न सरकारले देशभर एउटै प्रकारको ग्यास सिलिन्डर प्रयोगमा ल्याउने तयारी गरेको छ।

हाल नेपालमा विभिन्न ग्यास कम्पनीका ५८ वटा ब्रान्डका सिलिन्डर प्रचलनमा छन्। फरक–फरक ब्रान्डका सिलिन्डरका कारण एक कम्पनीको सिलिन्डर अर्को कम्पनीबाट साट्न नपाउने अवस्था रहेकाले उपभोक्ताले लामो समयदेखि असहजता भोग्दै आएका छन्।

सरकारले यही समस्या अन्त्य गर्न देशभर एउटै मापदण्ड र एउटै ब्रान्डको सिलिन्डर उपलब्ध गराउने अवधारणामा काम अघि बढाउन लागेको हो। नयाँ व्यवस्था लागू भएमा उपभोक्ताले जुनसुकै स्थानबाट पनि सहज रूपमा सिलिन्डर साट्न सक्ने अपेक्षा गरिएको छ।

यसबाट ग्यास वितरण प्रणालीलाई थप व्यवस्थित बनाउनुका साथै सिलिन्डर अभाव तथा साटफेरसम्बन्धी झन्झटसमेत कम हुने सरकारको तयारी छ।