हरी अधिकारी
प्रमुख जिल्ला अधिकारी ज्यु नमस्कार ।
वैशाख २५ गते पहिलो पटक कपिलवस्तुमा २ जनामा कोरोना पुष्टी हुँदा अव कोरोनाले खत्तमै पार्ने होकि भन्ने लाग्यो । त्यो बेला कपिलवस्तु सहित देशभर जम्मा १ सय १ पुगेको थियो वैशाख २५ सम्म । अहिले नेपालमै सर्वाधिक संक्रमित संख्या कपिलवस्तुमै छन् । ७७ जिल्लामै सवैभन्दा बढि २ सय ७० पुगेको कपिलवस्तु हो भने नेपालमा १५ सय ६७ पुगेको छ आज जेठ १८ गते सम्म । कोरोना संक्रमितका हिसावले कपिलवस्तु उच्च छ र पनि हाम्रो लागि सामान्य बनिसक्यो ।
सिडियो साव तपाई नआत्तिन्नुस, जिल्लाकै प्रशासनिक अंगको प्रमुख जिम्मेवारीमा हुनुहुन्छ । तपाई प्रजिअ भएको जिल्ला अर्घाखाँची कपिलवस्तुको शुरुवात वैशाख २५ गतेको कोरोना संक्रमितको तथ्यांकमा हुनुहुन्छ, त्यो संख्या भनेको २ हो । यो संख्या गुणत्मक हिसावले बढ्ने वाला छ अर्घाखाँचीमा पनि । शुरुमा कडाई भएको हामीकहाँ संक्रमितको संख्या २ सय ७० पुग्दा लकडाउन खुकुलो हुदै अत्यावश्यक खाद्यान्न तथा औषधी, वैंक तथा वित्तिय संस्थाहरु नियमित संचालन गर्ने कपिलवस्तु प्रशासनले निर्णय नै गरेको छ ।
हामीबाट आत्मबल बढाउने कुरा अनुशरण गर्नुहोस, नकि डर, त्रास र भय । छिमेकी जिल्ला र जन्मस्थलको हिसावले अर्घाखाँची प्यारो मातृभूमि हो मेरो लागि । कपिलवस्तुको १० वटै स्थानीय तह र प्राय सवै वडा वडामा कोरोना पुगिसकेको छ र पनि हामी कत्ति पनि विचलित छैनौ, आत्तिएका छैनौ, मात्तिएका छैनौं ।
अझ भनौ भने तिव्र संक्रमण फैलिएको देशका भारतीय मालवाहक गाडी सिमा नाका हुदै कृष्णनगर, खुनुवा, सुठौलीबाट हाम्रो घर आगन दिनहुँ सयौं गाडी भित्रिन्छन् । हामीलाई कुनै डर छैन,त्रास छैन सावधानी हुनु पर्दछ । अब रह्यो तपाइको आजको घटनाको प्रसंग – कपिलवस्तुको तरकारी पकेट एरिया बुद्धभूमि नगरपालिका धनकौली ९जुन अर्घाखाँचीको सिमासंग जोडिएको पालिका हो ।
धनकौलीबाट गएको तरकारी सन्धिखर्कमा नष्ट भयो, त्यो पनि तपाईको निर्देशनमा भन्दा सारै दुःख लाग्यो र हाम्रो लागि खेदजनक छ ।कपिलवस्तुवासीका लागि यो अत्यन्तै पीडादायी कुरा हो । कृषि कर्म बनाएर नेपाली किसानले उत्पादन गरेको तरकारी लकडाउनका बेला नष्ट गर्नु, विभिन्न वहानामा विपत्तीका बेला कल्पना भन्दा वाहिरको कदम हो ।
तपाईलाई स्मरण गराउन चाहान्छु । लकडाउनका कारण सवारी साधन नचलेका शुरुवाती चरण देखि नै कपिलवस्तुको तरकारी नविकेर किसानको बारी बारीमा तरकारी कुहिन थालेको समाचार मिडियामा आएकै थियो ।
जिल्ला भित्रै तथा छिमेकी जिल्लाबाट कसैले पनि अत्यावश्यक तरकारी गाडीमा लिन र किसानले मोटरसाइकलमा लिएर जाने अवस्था थिएन, कडा लकडाउन थियो । यस्तो समस्याबाट गुज्रिरहेका कपिलवस्तुका किसानको बारीमा तरकारी उठाएर जिल्ला भित्र र वाहिर पठाउने कार्यमा माननीय प्रदेश सभा सदस्य विष्णु पन्थीले खेलेको भूमिका संचार माध्यममा देखेकै हो ।
त्यति बेला पनि रुपन्देही, अर्घाखाँची, पाल्पा जिल्लामा रोक लगाउने प्रसंग उठ्दा सहजीकरण गरेर प्रदेश सभा सदस्य विष्णु पन्थीको अगुवाईमा कपिलवस्तुका किसानका तरकारी बारीबाट उठे । लकडाउनको चैत्र ११ गते पछाडीका दिनदेखि साँसद पन्थीले कपिलवस्तुको तरकारी पकेट एरिया बुद्धभूमि, वाणगंगा, कपिलवस्तु, शिवराज नगरपालिकाका तरकारी विक्री वितरणको लागि प्रंशसनीय भूमिका खेलेको संचार माध्यममै छ । यो त किसानको सन्दर्भमा मात्र छ ।
अब भन्नुहोस् सिडियो साव र अर्घाखाँचीका माननीय ज्यू ः कपिलवस्तुमा कोरोना संक्रमण फैलिएको तरकारीबाट हो, कपिलवस्तुकै तरकारीबाट अर्घाखाँची र रुपन्देहीमा फैलिएको हो कोरोना ? पाल्पामा हो, कदापी होइन । कोरोना कहाँबाट भित्रिएको छ सवैलाई प्रष्टै छ ।
तरकारी नफालौं आज अर्घाखाँचीले फाले जस्तै भोली रुपन्देही, पर्सी दाङ्ग, पाल्पा, गुल्मी हुदै अन्य जिल्लाले फाल्ने प्रबृतिले एकले अर्कालाई निषेधको गोरेटो कोर्न सक्छ । समयमै करेक्सन गरौं । सतर्कता र सचेतना अपनाऔं । कोरोनाको संक्रमणबाट आफु पनि बचौं र अरुलाई पनि बचाऔं ।
हरि अधिकारी कपिलवस्तु
