लुम्बिनी प्रादेशिक अस्पतालका मेडिकल सुपरिटन्डेन्ट डा. इन्द्र ढकालले आफ्नो सय दिनको उपलव्धी सार्वजनिक गरेका छन् । उनले लामो समयदेखि चिकित्सकीय परामर्श र शल्यक्रियाको लागि कुर्नु पर्ने समस्या समाधान हुँदै गएको दावी सहित आफू नियुत्ती भएको एक सय दिनको उपलव्धी सार्वजनिक गरेका हुन् । डा. ढकालले अस्पतालको विस्तारित सेवालाई प्रमुख उपलव्धीका रुपमा उल्लेख गरेका छन् । लुम्बिनी प्रादेशिक अस्पतालका एक सय दिनका काम भनेर सार्वजनिक गरिएको विवरणमा २२ वेड रहेको इमरजेन्सी वार्डमा १३ वेड थप गरी ३५ वेडमा विस्तार भएको उनले भनेका छन् । विवरणमा आन्तरिक व्यवस्थापनलाई सुधार गर्दै क्यासलेस डिस्चार्ज काउन्टर, पेपरलेस डिस्चार्ज सिस्टम तथा ईमेरजेन्सी काउन्टरको विस्तार भएको उल्लेख गरेका छन् । कोरोना महामारीको सरल र सहज व्यवस्थापन गर्नका लागि कोरोना सम्बन्धी उपचार एउटै छाना मुनि हुने व्यवस्था गरि कोरोना इमरजेन्सी सेवा विस्तार भएको डा. ढकालको दावी छ । ट्रामा रुप, मुटु रोग विभाग स्थापनाका लागि क्याथल्याव टेन्डर आह्वान, १० बेडको पेइंग वार्ड, एमआरआई मेसिनको लागि टेन्डरलगाएतका सेवाका बारेमा विवरणमा उल्लेख गरिएको छ । डा. ढकालको प्रगति विवरणमा न्योरो सर्जरी विभागलाई व्यवस्थित गर्दै चार सैयाको न्यूरो एचडीयू सेवा विस्तार, पाँच बेडमा संचालनमा रहेको डायलाईसिस सेवालाई १२ बेड थप गरी १७ बेडमा सेवा विस्तार लगाएतका उपलव्धलाई प्राथमकितामा राखिएको छ । डा. ढकालले गत असोज २८ गते लुम्बिनी प्रादेशिक अस्पतालको मेडिकल सुपरिटेन्डन्टका रुपमा कार्यभार ग्रहण गरेका थिए ।
लुम्बिनी अस्पतालका मेडिकल सुपरिटन्डेन्ट ढकाल द्धारा आफ्नो सय दिनको उपलव्धी सार्वजनिक
प्रकाशित : २०७८ पुष २९, बिहीबार १७:०६
© 2024: Lumbini Darpan Online | All right reserved | Privacy Policy
Powered by: ProTech