लक्ष्मी थारु, बाँके
इन्सेक लुम्बिनी प्रदेश कार्यालयको आयोजनामा नेपाल मानव अधिकार वर्ष पुस्तक –२०२४, प्रकाशन पूर्व अर्ध वार्षिक समीक्षा कार्यक्रम नेपालगञ्जमा असार १५ गते सम्पन्न भएको छ ।
कार्यक्रममा जिल्लामा सन् २०२३ जनवरीदेखि जुनसम्म ६ महिनामा संकलन गरिएका मानव अधिकार उल्लंघन र ज्यादतीका ८५ वटा घटना समेटिएको तथ्यांक जिल्ला प्रतिनिधि लक्ष्मी थारूले प्रस्तुत गर्नु भएको थियो ।
प्रस्तुत घटनाहरूमा बाल अधिकार अन्तर्गत बलात्कार , यौनदुव्र्यहार १७ , मानव बेचविखन तथा ओसार पसार तीन, अपहरण शरीर बन्धक एक, महिला अधिकार अन्तर्गत बलात्कार, बलात्कार प्रयास १२, अपहरण तथा शरीर बन्धक एक, मानव बेचबिखन तथा ओसारपसार ६, घरेलु हिंसाका २१, बहुविवाह १३, दुर्व्यवहार ६, जातिय विभेद एक, हत्या दुई ,हत्याको प्रयास दुई वटा रहेका छन् ।
कार्यक्रममा प्रमुख जिल्ला अधिकारी विपीन आचार्यले नेपाल मानव अधिकार वर्ष पुस्तकमार्फत मानव अधिकारको अवस्था तथ्य देखाउने भएकाले आफूले निरन्तर अध्ययन गर्ने गरेको भन्दै घटनाका प्रकृति अनुसार दुर्व्यवहारका घटना प्रशासन कार्यालयमा थुप्रै भएको बताउनु भयो ।
जिल्ला प्रहरी कार्यालयका एसपी सन्तोषसिंह राठौरले कारागार र बाल सुधार गृहमा क्षमता भन्दा बढी संख्यामा कैदी बन्दी र कानुनको विवादमा रहेका व्यक्ति रहेको विषयलाई पनि उल्लेख गर्नु पर्ने बताउनु भयो ।
राष्ट्रिय मानव अधिकार आयोग नेपालगञ्जकी प्रमुख द्वारीका अधिकारीले महिला र बालिकाहरूको घटना बढी आउने गरेकोले सम्बन्धीत निकायमा कानुनी प्रक्रियामा जान सहयोग गरेको बतनाउनु भयो ।
फियान नेपालगञ्जका संयोजक सुरेश गौतमले मौलिक हक, आर्थिक , सामाजिक, साँस्कृति तथा राजनीतिक अधिकारबाट वञ्चित भएका घटना समेट्नुपर्ने बताउनु भयो ।
अभियान नेपालकी प्रमुख कमला पन्तले इन्सेकको तथ्याङ्कले सरकार तथा अन्य सामाजिक न्यायका क्षेत्रमा काम गर्नेलाई मार्ग निर्देशन गर्ने गरेको बताउनु भयो।
इन्सेक कार्यक्रम अधिकृत सरस्वती मल्लले कार्यक्रमको उद्देश्यमाथि प्रकाश पार्नु भएको थियो ।
