कपिलवस्तुमा शंकरपुर तालको जग्गा अतिक्रमण

[sharethis-inline-buttons]

कपिलवस्तु । कपिलवस्तुको विजयनगर गाउँपालिकाको शंकरपुर ताल अतिक्रमणमा परेको छ । गत वर्ष वर्षामा तालको बाँध भत्किएपछि घाँसे मैदान बनेको तालमा अतिक्रमण सुरु भएको हो ।

हाल वर्षातको सिजन भए पनि तालमा पानी छैन । त्यसैमा स्थानीयले कब्जागरी खेती गर्न सुरु गरेका छन् । राजनीतिक दलको आडमा जबरजस्ती तालको जग्गा कब्जाको प्रयास भएको स्थानीयहरुको भनाइ छ ।

५० बिघाभन्दा बढी क्षेत्रफलमा फैलिएको तालको डिलमा विप्लव समूहका कार्यकर्ताले जोतभोग गर्न थालेको चेतनशील सामुदायिक वन उपभोक्ता समूहले जनाएको छ । वन समूहले असार २७ गते डिभिजन वन कार्यालय (गौतमबुद्ध) चन्द्रौटालाई पत्राचार गरी अतिक्रमण हटाउन अनुरोध समेत गरेको छ ।

सो पत्रमा नेकपा माओवादी (विप्लव) का केही कार्यकर्ता मिली पटक–पटक अनधिकृत रुपमा ३ हेक्टर जग्गा ताल र बनको जग्गा अतिक्रमण गरेको उल्लेख गरिएको छ । शिवगढी सवडिभिजन कार्यालयका अधिकृत दीपक चौधरीले अतिक्रमण गरिएको जग्गा हटाउन आवश्यक पहलको प्रक्रिया चालिएको बताउनुभयो ।

शंकरपुर ताल गाउँपालिकाको पर्यटकीय सम्भावना रहेको क्षेत्र समेत मानिन्छ । तालको संरक्षण र प्रवर्धन नहुँदा अतिक्रमणको जोखिममा परेको छ । ताल छेउछाउ अतिक्रमण गरी अडहर खेती सुरु भएको स्थानीयको भनाइ छ ।

(गोरखापत्र)


प्रकाशित : २०८० श्रावण १७, बुधबार १५:३८