हरि आचार्य, कपिलवस्तु
कपिलवस्तुको बाणगंगा नगरपालिका वडा नम्बर ८ मा रहेको भूपू सैनिक इङ्गली्ल बोर्डिङ्ग स्कुलमा वार्षिक खेलकुद महोत्सव सुरु भएको छ । सोमबार देखि २ दिने खेलकुद महोत्सव बालापुरमा रहेको मायादेवी रङ्गशालामा उद्घाटन गरिएको हो । उद्घाटन कार्यक्रममा विद्यार्थीहरुले मार्चपास गरि ओलम्पिक टर्च बालेर खेलमैदान परिक्रमा गरिएको थियो । मार्च पासको सहजिकरण शिक्षक प्रतिक गुरुङले गर्नुभएको थियो ।
खेलकुद महोत्सवको उद्घाटन गर्दै बाणगंगा नगरपालिका कार्यपालिका सदस्य शारदा परियारले नेपालले पछिल्लो समय खेलकुदमा राम्रो प्रगति गरिरहेको भन्दै विद्यालय स्तर बाटै खेलकुदलाई महत्वमा राख्नुपर्ने बताउनुभयो । कार्यक्रमका प्रमुख अतिथि समेत रहनुभएका परियारले राष्ट्रिय तथा अन्तराष्ट्रिय स्तरका खेलमा प्रतिसपर्धा गर्ने खेलाडी उत्पादन गर्न यस्ता खेलकुद महोत्सवले महत्वपुर्ण भुमिका निर्वाह गर्ने उहाँले बताउनुभयो ।
त्यस्तै बाणगंगा नगरपालिका शिक्षा, युवा तथा खेलकुद शाखा प्रमुख खिम बहादुर जि.सी.ले विद्यार्थीको चौतर्फी विकासको लागि खेलकुद निक्कै महत्वपुर्ण रहेको बताउनुभयो । कार्यक्रमका विशिष्ठ अतिथि समेत रहनुभएका जिसीले विद्यार्थीको उमेर, क्षमता, रुची र चाहाना अनुसारका खेलकुदलाई विद्यालयले प्राथमिकता दिनुपर्ने उहाँले बताउनुभयो ।
खेलकुद महोत्सवमा फुटबल, क्रिकेट, दौड अन्तर्गत १ सय र २०० मिटर, ज्याब्लिङ थ्रो, लङजम्प, हाइजम्प, त्रिपल जम्प, विभिन्न किसिमका मनोरञ्जनात्मक खेलहरु सञ्चालन हुने विद्यालयका प्रधानाध्यापक डम्बर बहादुर सोमैले लुम्बिनी दर्पणलाई बताउनुभयो । उद्घाटन कार्यक्रमका अध्यक्ष समेत रहनुभएका सोमैले विद्यार्थीको माग र आवश्यकता अनुसार हरेक बर्ष खेलकुद महोत्सव आयोजना गर्दै आएको यस बर्ष पनि निरन्तरता दिएको बताउनुभयो ।
कार्यक्रममा विद्यालय व्यवस्थापन समितिका अध्यक्ष राजेन्द्र विक्रम शाह, सदस्यहरु सुर्य गुरुङ, चक्र बहादुर भण्डारी शिक्षक, विद्यार्थी, लगायतको उपस्थिती रहेको कार्यक्रम विद्यालयकी शिक्षिका संगीता कार्कीको सञ्चालनमा सम्पन्न भएको थियो ।
