हरि आचार्य, कपिलवस्तु
खानेपानी तथा सरसफाई उपभोक्ता महासंघ नेपाल बाणगंगा नगरको अध्यक्षमा पुनः विश्व कार्की चयन हुनुभएको छ । बाणगंगाको नन्दनगरमा रहेको बाणगंगा खानेपानी तथा सरसफाई संस्थाको सभाहलमा भएको महासंघ बाणगंगाको दोस्रो नगर अधिवेशनबाट कार्की अध्यक्षमा सर्वसम्मत चयन हुनुभएको हो । कार्की आगामी चार वर्षका लागि अध्यक्षमा पुनः चयन हुनुभएको हो ।
जसको उपाध्यक्षमा सञ्जु सेन, सचिवमा खडानन्द गौतम, सह सचिवमा पुष्पा भण्डारी र कोषाध्यक्षमा कल्पना पौडेल चयन हुनुभएको छ । यस्तै सदस्यहरुमा यमकुमारी गाहा, प्रेम पौडेल, नवराज पन्त, विष्णु वि.सि. र शान्ता न्यौपाने चयन हुनुभएको निर्वाचन मण्डल संयोजक शान्ता पाण्डेले बताउनुभयो ।
अध्यक्ष कार्कीले नगरपालिकामा रहेका खानेपानी संस्थाहरुको अनुगम, संरक्षण तथा प्रवद्र्धनमा आफु लागिरहने बताउनुभयो । बाणगंगा खानेपानी तथा सरसफाई संस्थाका अध्यक्ष समेत रहनुभएका कार्कीले पनि हरेक परिवारको घरघरमा सुरक्षित खानेपानी उपलब्ध गराउन सक्रिय रुपमा लागेको बताउदै आगामी दिनमा पनि महासंघलाई अझ सशक्तढङ्ग बाट लैजाने प्रतिवद्धता व्यक्त गर्नुभयो ।
कार्यक्रमलाई सम्बोधन गर्दै बाणगङ्गा नगरपालिकाका मेयर चक्रपाणी अर्यालले बाणगङ्गाले खानेपानीको क्षेत्रमा गरेको कार्यको सबैले प्रशंसा गरेको बताउनुभयो । कार्यक्रमका प्रमुख अतिथि समेत रहनुभएका मेयर अर्यालले नागरिकको स्वास्थ्य सङ्ग प्रत्यक्ष रुपमा जोडिएको खानेपानीको सम्बन्धमा नगर सचेत रहेको पनि उहाँले बताउनुभएको छ । मेयर अर्यालले खानेपानीको गुणस्तर कायम गर्नको लाग नगरपालिकाले संघसंस्थाको नियमित अनुगमन र निरीक्षण गरिरहेको बताउनुभयो । बाणगङ्गामा अहिले १ लाख भन्दा धेरै जनसंख्या रहेको भन्दै यहाँ खानेपानीको योजनालाई दीर्घकालीन हुनेगरी बनाउन आवश्यक रहेको बताउनुभयो ।
त्यस्तै खानेपानी तथा सरसफाई उपभोक्ता महासंघ कपिलवस्तुका अध्यक्ष राजेन्द्र विक्रम साहले पछिल्लो ५ देखि ७ वर्षको बिचमा बाणगङ्गा भित्र करिब ५० प्रतिशत परिवारलाई सुरक्षित खानेपानी वितरण गरेको बताउनुभयो । अध्यक्ष साहले सुरक्षित खानेपानीको सबालमा जिल्लामै बाणगङ्गा नगरपालिका अब्बल रहेको बताउनुभयो ।
त्यस्तै कार्यक्रममा बोल्दै बाणगङ्गा नगरपालिकाका नगर प्रवक्ता विष्णु प्रसाद पौडेलले सुरक्षित खानेपानी वितरण कार्यमा नगर प्रतिबद्ध रहेको बताउनुभयो ।
