हरि आचार्य, कपिलवस्तु
नेकपा (एमाले) बाणगङ्गा नगरपालिका वडा नं.७ वडा कमिटीको आयोजनामा पार्टीको बाणगंगा नगर कमिटी उपाध्यक्ष भिम बहादुर थापाका बुवा लेख बहादुर थापाको निधनको स्मृतिमा शोक सभा सम्पन्न भएको छ । दिवगंगत लेख बहादुर थापाको निधनको ७ औं दिनको स्मृतिमा उहाँकै निवासमा शोक सभा गरिएको हो ।
शोक सभालाई सम्बोधन गर्दै पार्टीका केन्द्रिय सदस्य तथा कपिलवस्तु जिल्ला ईन्चार्ज गिरधारीलाल न्यौपानेले जनताको दुखमा साथ दिने व्यक्तिको मरण पनि सजिलो हुने भएकोले एमाले पार्टीका नेता कार्यकर्ता जनताको सुख दुखमा सदैव साथमा रहने बताउनुभयो । शोक सभाका प्रमुख अतिथि समेत रहनुभएका नेता न्यौपानेले दिवंगत थापाले गरेको पार्टी प्रतिको योगदान अतुलनिय रहेको भन्दै एमाले थापा परिवारको सदैव रहने बताउनुभयो । उहाँले दिवंगत थापा प्रति हार्दिक श्रद्धाञ्जली प्रकट गर्दै शोकाकुल परिवार तथा आफन्तजन प्रति गहिरो समवेदना प्रकट गर्नुभयो ।
त्यस्तै पार्टीका जिल्ला जिल्ला कमिटी सदस्य तथा वडा नं. ७ का वडाध्यक्ष बिष्णु गिरीले दिवंगत थापाको जिवनी प्रस्तुत गर्दै उहाँको पार्टी प्रतिको योगदानको बारेमा स्मरण गर्नुभयो । पार्टीका वडा ईन्चार्ज समेत रहनुभएका गिरीले दिवंगत थापा सिंगो वडाकै अभिभावक भएकाले आगामी दिनमा उहाँको उपदेशको पालना गर्दै अगाडि बढ्ने प्रतिवद्धता व्यक्त गर्नुभयो ।
त्यस्तै पार्टीका नगर कमिटीका अध्यक्ष सोमनाथ अर्यालले शोक मन्तब्य राख्दै नगर कमिटीका उपाध्यक्ष भीम बहादुर थापाका बुवाको निधन प्रति नगर कमिटी स्तब्ध भएको भन्दै श्रद्धाञ्जली व्यक्त गर्नुभयो । उहाँले पार्टी नगर कमिटी सदैव थापा परिवारको साथमा रहेको बताउनुभयो ।
कार्यक्रममा उपस्थित एमालेका नेता तथा कार्यकर्ताले दिवगंत थापाको तस्बिरमा टिका लगाई श्रद्धाञ्जली व्यक्त गर्नुका साथै परिवार प्रति समवेदना प्रकट गरेका थिए । वडा कमिटीका अध्यक्ष कृष्ण खनालको अध्यक्ष्ता रहेको शोक सभा वडा कमिटीका उप सचिव नमु थापाको संचालनमा सम्पन्न भएको वडा कमिटीले जनाएको छ ।
