लुदस, कपिलवस्तु
नेकपा एमाले जिल्ला कमिटी कपिलवस्तुको आयोजनामा पार्टीका जनबर्गीय संगठनहरूको संयन्त्र बैठक सम्पन्न भएको छ । बाणगंगा नगर कमिटीको कार्यालय, बैरियामा आयोजित उक्त बैठकमा नेकपा एमालेका केन्द्रीय सदस्य तथा कपिलवस्तुका पार्टी इन्चार्ज एवं लुम्बिनी प्रदेशसभा सांसद गिरधारिलाल न्यौपाने प्रमुख अतिथि रहनुभएको थियो ।
बैठकलाई सम्बोधन गर्दै सांसद न्यौपानेले एमाले पार्टीप्रति युवाहरूको ठूलो भरोसा रहेको उल्लेख गर्दै पार्टीको रचनात्मक कार्यशैलीका कारण विपक्षीहरू अतालिएको दाबी गरे। उनले पार्टीले सञ्चालन गरेको तीन महिने वडा केन्द्रित ‘जरा अभियान’लाई सफल बनाउन जनताको घरदैलोमा पुगेर पार्टीले गरेका राम्रा कामको प्रचारप्रसार गर्न आग्रह गरे ।
प्रदेश कमिटीका सदस्य धर्म भुसालले पार्टीको पहिलो तह नै ‘ग्रासरुट’ भएकाले वडा कमिटीमार्फत संगठन विस्तार गर्नुपर्ने धारणा राखे। उनले जनस्तरमा सक्रियता बढाउन पार्टी संगठनलाई अझै सशक्त बनाउनु आवश्यक रहेको बताए ।
यसैगरी, जिल्ला कमिटी अध्यक्ष बाबुराम खनालले तीन महिने वडा केन्द्रित अभियानलाई व्यापक बनाउन जोड दिए। उनले २३ वटा जनसंगठनहरू सक्रिय रूपमा सञ्चालनमा ल्याउनु पर्ने आवश्यकतामा पनि जोड दिए । बैठकमा सहभागी विभिन्न जनसंगठनका प्रतिनिधिहरूले आफ्नो संगठनको गतिविधि, उपलब्धि र आगामी योजना बारे जानकारी गराएका थिए ।
कार्यक्रम नेकपा एमाले जिल्ला कमिटी अध्यक्ष बाबुराम खनालको अध्यक्षतामा सम्पन्न भएको थियो भने, प्रमुख अतिथि सांसद गिरिधारिलाल न्यौपाने, जिल्ला नेता सुन्दरा दर्लामी र प्रदेश कमिटी सदस्य धर्म भुसाल रहेका थिए । बैठकको सञ्चालन जिल्ला कमिटी सचिव सि.बी. गहतराजले गरेका थिए ।
