हरि आचार्य, कपिलवस्तु
विद्यार्थीहरुलाई शैक्षिक क्रियाकलाप मात्र नभई अतिरिक्त क्रियाकलापमा समेत सक्रिय सहभागी गराउदै आएको कपिलवस्तुको बाणगंगा नगरपालिका वडा नं. ११ ओदारी हथौसा लिटल स्टार बोर्डिङ्ग स्कुलले २१ औं वार्षिक समारोह तथा अभिभावक दिवस भव्यताका साथ मनाएको छ । स्कुलको प्रांगणमा आयोजित समारोहमा वार्षिक परीक्षाफल प्रकाशन तथा पुरस्कार वितरण गर्नुका साथै विद्यार्थी तथा शिक्षकहरुका समेत मनोरन्जनात्मक प्रतिभा प्रस्तुत गरिएको थियो ।
एक शैक्षिक सत्रभर विभिन्न खेलकुद, अतिरिक्त क्रियाकलाप तथा शैक्षिक प्रतियोगिताहरूमा उत्कृष्ट प्रदर्शन गरेका विद्यार्थीहरूलाई ट्रफी, मेडल तथा प्रमाणपत्र वितरण गरिएको हो । कक्षा नर्सरीदेखि कक्षा ९ सम्मका विद्यार्थीहरूलाई विभिन्न विधागत तथा शैक्षिक उपलब्धिका आधारमा सम्मान गरिएको छ ।
कार्यक्रमको अवसरमा भूमि व्यवस्था, सहकारी तथा गरिवी निवारण मन्त्री बलराम अधिकारी प्रमुख अतिथिको रूपमा उपस्थित रहनुभएको थियो । उहाँले स्कुलले गुणस्तरीय शिक्षामा उल्लेखनीय योगदान दिँदै आएको भन्दै प्रशंसा गर्नुभयो । साथै, आर्थिक रूपमा कमजोर विद्यार्थीहरूलाई निःशुल्क वा न्यून शुल्कमा शिक्षा उपलब्ध गराउनुपर्नेमा जोड दिँदै, प्रविधिमार्फत शिक्षण पद्धतिलाई अझ प्रभावकारी बनाउन शिक्षकहरूलाई आग्रह गर्नुभयो । साथै, उत्तीर्ण विद्यार्थीहरूलाई बधाई तथा शुभकामना व्यक्त गर्नुभयो ।
कार्यक्रममा विद्यार्थीहरू र शिक्षकहरूको मनोरञ्जनात्मक प्रस्तुतीले उपस्थित अभिभावक तथा अतिथिहरूलाई मन्त्रमुग्ध बनाएको थियो ।
विद्यालयका अभिभावकहरूले पनि आफ्नो विश्वास अनुसार बालबालिकाले गुणस्तरीय शिक्षा प्राप्त गरिरहेको प्रतिक्रिया दिएका थिए ।
स्कुलका प्रिन्सिपल सुन्दर पाण्डेले विद्यालयलाई यो स्थानसम्म पु¥याउन सहयोग गर्ने सम्पूर्णलाई धन्यवाद दिँदै भविष्यमा पनि निरन्तर साथ र सहयोगको अपेक्षा राख्नुभयो । उहाँले सामुदायिक र निजी विद्यालयका विद्यार्थीबीच कुनै विभेद नरहेको स्पष्ट पार्दै यस्तो भ्रममा नपर्न आग्रह गर्नुभयो । पाण्डेले विद्यालयले विज्ञान, प्रविधिमैत्री, शिक्षण पद्धती अबलम्बन गर्ने बताउनु भयो । विद्यालयले वालवालिकालाई विश्वव्यापी प्रतिष्प्रर्धी बनाउन आइएसए/एसक्युटिसी जस्ता कार्यक्रमलाई निरन्तरता दिदै वर्तमान समय सान्दर्भिक कार्यक्रमहरु गर्ने प्राचार्य पाण्डेले बताउनु भयो । विद्यालयले शिक्षण सिकाई प्रभावकारी र वालवालिकालाई संस्कारी, नैतिकवान बनाउन प्रयत्न गर्ने बताउनु भयो ।
विद्यालयका शिक्षा, उपलब्धि तथा सम्मानहरूको समग्र विवरण पनि कार्यक्रममा प्रस्तुत गरिएको थियो ।
कार्यक्रमको अध्यक्षता विद्यालय सञ्चालक समितिका अध्यक्ष बाबुराम आचार्यले गर्नुभएको थियो । कार्यक्रममा विद्यालयका पूर्व सञ्चालक, पूर्व शेयर सदस्य, शिक्षक, अभिभावक, विद्यार्थी लगायतको उल्लेख्य उपस्थिति रहेको थियो ।
