हरि आचार्य, कपिलवस्तु
होटल तथा पर्यटन व्यवसायी संघ कपिलवस्तुको आयोजनामा १४ दिने कफि वारिस्ता तालिम सुरु भएको छ । बाणगंगा नगरपालिका वडा नं. १० को आर्थिक सहयोग तथा संघको आयोजनाामा महिला तथा पुरुषहरुका लागि सीप विकास अन्तर्गत १४ दिने ‘कफि वारिस्ता तालिम’ को आज उद्घाटन गरिएको हो ।

तालिमको उद्घाटन गर्दै बाणगंगा नगरपालिकाका प्रमुख प्रशासकीय अधिकृत भक्तिराम मरासिनीले स्थानीय सरकारले नागरिकको सीप विकास गरि स्वरोजगार र रोजगारको अवसरहरुको सृजना गर्ने कार्य गरिरहेको बताउनुभयो । कार्यक्रमका प्रमुख अतिथि समेत रहनुभएका मरासिनीले तालिम तालिमका लागि मात्र नभई परिणाममुखी हुनुपर्ने बताउदै होटल तथा पर्यटन व्यवसायी संघ कपिलवस्तुले संचालन गरेका तालिम प्रभावकारी हुंदै आएको बताउनुभयो ।

होटल तथा पर्यटन व्यवसायी संघ कपिलवस्तुका अध्यक्ष रबिन्द्र पौडेलले कफि वारिस्ता तालिमले स्वदेश मात्र नभई वैदेशिक रोजगारीमा जानेलाई पनि आयआर्जनको माध्यम बनिरहेको बताउनुभयो । उहाँले संघले विभिन्न खालका तालिमहरुको संचालन गरि नागरिक उद्यमशिल, रोजगार तथा स्वरोजगार बनेको तथ्यांक समेत रहेको बताउनुभयो । सहभागीहरुलाई नबुझेको बिषय प्रशिक्षकलाई सोध्न अनुरोध गर्दै संघले अनुगमन गर्ने बताउनुभयो ।

तालिमको प्रमुख प्रशिक्षकको रुपमा संजय घिमिरे रहनुभएको छ । उहाँले १४ दिन सम्म सहभागीहरुलाई सक्रिय रुपमा तालिममा सहभागी हुन आग्रह गर्नुभयो ।

संघका अध्यक्ष रबिन्द्र पौडेलको अध्यक्षता, बरिष्ठ उपाध्यक्ष झिमलाल सापकोटाको स्वागत मन्तब्यमा सम्पन्न उद्घाटन कार्यmक्रममा संघका पदाधिकारी, सदस्य तथा सहभागीहरुको उपस्थिती रहेको थियो ।