लुदस, कपिलवस्तु

अष्ट्रेलियाको बेन्डिगोमा नेपालीहरुले भव्य रुपमा नयाँ बर्ष २०८२ मनाएका छन् । रोजगारीको सिलसिलामा अष्ट्रेलिया पुगेका नेपालीहरुले धुमधामसंग नयाँ बर्ष मनाएका हुन।  ‘नेप्लिज इन बेन्डिगो’ को आयोजनामा भव्य सांस्कृतिक तथा मनोरञ्जनात्मक कार्यक्रम समेत गरिएको थियो । उक्त कार्यक्रमले नेपाली समुदायबीच आपसी सम्बन्ध, एकता र संस्कृतिको प्रवर्द्धनमा विशेष योगदान पुर्याएको आयोजकले बताएका छन् ।

देवेन्द्र र प्रमिलाको स्वागत र परिचयबाट कार्यक्रमको थालनी गरिएको थियो। अध्यक्षको स्वागत मन्तव्य, अतिथिहरूको स्वागत र खादा वितरणपछि ५:५० बजे पनसमा बत्ती बालेर औपचारिक उद्घाटन गरिएको हो । त्यसपछि राष्ट्रिय गानपछि सचिव नबिन ढकालले संस्थाको संक्षिप्त प्रस्तुतिकरण र अध्यक्ष कमल गौतमले स्वागत मन्तव्य राखेका थिए । सोही दिन साँझ ६:४० सांस्कृतिक तथा मनोरञ्जनात्मक कार्यक्रममा प्रदीपले संक्षिप्त परिचयपछि भिडियो प्रस्तुत गरेका थिए । त्यसपछि कृतिकाले पनि आफ्नो नृत्य गरेकी थिइन् । प्रदीप, बिक्रम र अमितले संयुक्त रूपमा गरेको लाइभ म्यूजिक प्रस्तुति तथा रमाइला खेलहरूले माहोल झन् उत्साहपूर्ण बनाएको थियो। सोही दिन तेस्रो तथा समापन चरणमा ७:५५ बजे नयाँ वर्षको शुभकामना आदानप्रदान गर्दै देवेन्द्र र प्रमिलाले धन्यवाद मन्तव्य दिएका थिए।

कार्यक्रममा ‘टोकन अफ लभ’ वितरण गरिनुका साथै सचिव नबिन ढकालले आगामी “तीज महोत्सव” को घोषणा पनि गरे। समापन समारोह समूहको नृत्यसँगै त्यहाँको माहोल झनै तातेको थियो । कार्यक्रम सफल बनाउन थुप्रै व्यक्तिहरूको विशेष भूमिका रह्यो। योजना निर्माणदेखि कार्यान्वयनसम्म नबिन ढकाल, केशव पन्थी र प्रदीप श्रेष्ठको विशेष योगदान उल्लेखनीय छ । बिक्रम तामाङ, देवेन्द्र बजगाईं र प्रदीप श्रेष्ठको सक्रियता उपसमितिको रूपमा प्रशंसायोग्य रह्यो।

स्वयंसेवकहरू – प्रमिला पौडेल, दिक्ष्या उप्रेती, हिमाल चन्द्र न्यौपाने, सफल केसी, अभिदित कंडेल, एलिशा मेन्डोजा, प्रतिमा खनाल र रोशन अधिकारीको योगदान पनि अत्यन्त महत्वपूर्ण रह्यो। कार्यक्रमलाई सफल बनाउन साथ दिने प्रायोजकहरू – ICS Migration & Education, Capkon (देवल भण्डारी), Amber Real Estate, Spice and Grain, Visa Direct Education and Migration, Hal’s Motor, Luxe Skin Anesthetica र Big Bazar लाई आयोजक समितिले विशेष धन्यवाद दिएको छ।

प्रमुख अतिथि एनआरएनए अष्ट्रेलियाका पूर्व अध्यक्ष तथा ANMC का उपाध्यक्ष केशव कँडेल तथा अन्य सम्माननीय अतिथि बिमल कार्की, देवल भण्डारी, रामकुमार श्रेष्ठ, दधिराज वाग्ले, मात्रिका खनाल, पूरक श्रेष्ठ र Quarry Hill Golf Club का प्रतिनिधिहरूको उपस्थिति कार्यक्रमको गरिमा बढाउने खालको रह्यो। कार्यक्रमपश्चात ८:३० बजेबाट फुड कोर्ट सञ्चालनमा ल्याइएको थियो, जहाँ सहभागीहरूले स्वादिलो नेपाली परिकारको आनन्द लिएका थिए। Nepalese in Bendigo ले आगामी दिनमा अझ बढी सहभागीमूलक र सांस्कृतिक कार्यक्रम ल्याउने प्रतिबद्धता जनाउँदै सहभागी सबैलाई धन्यवाद व्यक्त गरेको छ।