हरि आचार्य, कपिलवस्तु
कपिलवस्तु । नेकपा (एमाले) केन्द्रीय सदस्य तथा कपिलवस्तु इन्चार्ज गिरधारिलाल न्यौपानेले भारत–चीनबीच नेपालको सहमति बिना लिपुलेक नाका प्रयोग गर्ने सम्झौता गम्भीर विषय भएको बताएका छन् ।
उनले नेपाल सार्वभौमसत्तासम्पन्न राष्ट्र भएकाले सिमा रक्षामा दल, विचार वा पदभन्दा माथि उठेर एकजुट भई लड्नुपर्नेमा जोड दिए । “भारत र चीनबीचको सहमति हाम्रो राष्ट्रको अनुमोदन बिना भएकोले यो बाह्य हस्तक्षेपको उदाहरण हो,” उनले बताए ।
सिमा विवादको समाधानका लागि सन् १८१६ को सुगौली सन्धिले तोकेको सीमा नै आधिकारिक मान्नुपर्ने भन्दै न्यौपानेले त्रिपक्षीय वार्ताबाट समाधान खोज्नुपर्ने धारणा राखे ।
उनका अनुसार एमालेको केन्द्रीय कमिटी बैठकमा सीमा विवाद र बाह्य शक्तिको हस्तक्षेपबारे गम्भीर छलफल हुनेछ । “जस्तो विगतमा कालापानी, लिपुलेक, लिम्पियाधुरा समेटिएको चुच्चे नक्सा सर्वदलीय सहमतिमा जारी गरिएको थियो, अहिले पनि त्यस्तै एकताबद्ध भएर सामना गर्नुपर्छ,” उनले भने ।
“राष्ट्रको अखण्डता र स्वतन्त्रता माथि उत्तर वा दक्षिण जुनसुकै दिशाबाट हुने हस्तक्षेपको प्रतिकार गर्नु हाम्रो कर्तव्य हो,” नेता न्यौपानेले चेतावनी दिए ।
