हरि आचार्य, कपिलवस्तु
मनकामना सामुदायिक वन उपभोक्ता समुह बाणगंगा १ र २ कपिलवस्तुको १८ औं बार्षिक साधारण सभा मंसिर ६ गते शनिवार हुने भएको छ । आज बसेको बनको विस्तारित बैठकले उक्त निर्णय गरेको हो । उक्त बैठकले साधारण सभामा प्रस्तुत गरिने आन्तरिक लेखा परिक्षण प्रतिवेदन, अघिल्लो आर्थिक बर्षको प्रगति प्रतिवेदन, आगामी कार्ययोजना, नीति तथा कार्यक्रम समेत सबैका सल्लाह सुझाव सहित अन्तिम रुप दिने निर्णय गरिएको वनका अध्यक्ष मुक्त बहादुर कार्कीले बताउनुभयो ।
साधारण सभाका लागि आर्थिक, प्रगति, अध्यक्ष लगायतका प्रतिवेदनहरु तयार पार्ने र किताब प्रकाशनको तयारी गरिएको वनका सचिव गंगा कुमारी भट्टराईले जानकारी दिनुभयो ।
विस्तारित बैठकमा वनका उपाध्यक्ष पुष्कर घिमिरेले चालु आर्थिक बर्षका लागि तर्जुमा गरिएका नीति कार्यक्रमहरु राख्दै सहजिकरण गर्नुभएको थियो ।
वनका अध्यक्ष मुक्त बहादुर कार्कीको अध्यक्षता, सचिव गंगा कुमारी भट्टराईको संचालनमा सम्पन्न बैठकमा कार्यसमितिका पदाधिकारी, सदस्य, सल्लाहकार समिति, लेखा समिति, अनुगमन समितिका पदाधिकारी तथा सदस्यहरु र पत्रकारको उपस्थिती रहेको थियो ।
