लुदस, कपिलवस्तु
कपिलवस्तु जिल्लाको मायादेवी साझेदारी वन उपभोक्ता समुहले साझेदारी वनको संरक्षण, संबद्र्धन, दीगो उपयोग, बातावरण सन्तुलन तथा जैविक विविधता संरक्षणमा एवं गरिबी न्यूनीकरणमा उल्लेखनीय कार्य गरेकामा देशभरमै तेस्रो भई पुरस्कृत भएको छ । सामुदायिक वन दिवश २०८२ को अवसर पारेर वन तथा वातावरण मन्त्री ऐनबहादुर शाही ठकुरी, मन्त्रालयका सचिव डा. राजेन्द्रकुमार मिश्र र वन तथा भू–संरक्षण विभागका महानिर्देशक बद्रिराज ढुंगानाले नगद २५ हजार सहित मायादेवी साझेदारी वनलाई साझेदारी वन राष्ट्रिय तेस्रो पुरस्कार हस्तान्तरण गरेका हुन।
साझेदारी वनका अध्यक्ष दिनेश प्रसाद जयसवाल र उपाध्यक्ष शैलेन्द्र कुमार यादवले सो पुरस्कार ग्रहण गरेका थिए । त्यसै गरि मन्त्रालयले डिभिजन वन कार्यालय कपिलवस्तुलाई समेत कार्यक्रममा सम्मानित गरेको थियो ।
मन्त्री शाही र सचिव मिश्रले डिभिजन वन कार्यालय कपिलवस्तुका निमित्त प्रमुख रहेका बरिष्ठ वन अधिकृत मदन ढुंगानालाई सम्मानपत्र हस्तान्तरण गरेका थिए। वनको संरक्षण, संबद्र्धन, दिगो उपयोग, बातावरण सन्तुलन तथा जैविक बिबिधता संरक्षणमा एवं गरिबी न्यूनिकरणमा उल्लेखनिय कार्य गरेकामामा डिभिजन बनलाई सम्मानित गरिएको हो ।
कार्यक्रममा साझेदारी वन तर्फ मध्यविन्दु साझेदारी वन उपभोक्ता समूह प्रथम, बेलबारी चिसाङ साझेदारी वन उपभोक्ता समूह द्वितीय भई पुरस्कृत भएका थिए । त्यसैगरि सामुदायिक वन तर्फको १ लाख राशीको गणेशमान सिंह सामुदायिक वन प्रथम पुरस्कार मोरङको देविझोडा सामुदायिक वन उपभोक्ता समूहले प्राप्त गरेको छ । त्यसैगरि तनहुँको मधुवन सामुदायिक वन उपभोक्ता समूह दोस्रो, काठमाडौंको लगलगेपाखा सामुदायिक वन उपभोक्ता समूह तेस्रो भई पुरस्कृत भए ।
