लुदस, कपिलवस्तु
बाणगंगा नगरपालिका–१ बुंचीस्थित शिव मन्दिर सामुदायिक वन उपभोक्ता समितिको १९ औं वार्षिक साधारण सभा समितिको प्राङ्गणमा सम्पन्न भएको छ ।
साधारण सभामा समितिका अध्यक्ष झलक मल्ल ठकुरीले स्थानीय स्रोत साधनको पहिचान र परिचालन, सम्पर्क–समन्वयमा आधारित विकास र विस्तार, सदस्यलाई सहयोग गर्ने मूल्यमा आधारित दिगो र सुशासनयुक्त सामाजिक संस्था निर्माण गर्ने लक्ष्य प्रस्तुत गरे ।
उनले वृक्षरोपण, बिरुवा हुर्काउने, कटान तथा वितरण, आवश्यक स्रोत व्यवस्थापनका साथै भरपर्दो माध्यमबाट सेवा सञ्चालन गर्ने, वन विभाग, सम्बन्धित कार्यालय र स्थानीय संघ–संस्थाको सहकार्यमा सामुदायिक वन क्षेत्रमा पर्यटकीय स्थल निर्माण गर्न पहल गर्ने उद्देश्यसमेत अघि सारे । वि.स. २०५७ सालदेखि सञ्चालनमा आएको समितिमा हाल करिब १३ सय उपभोक्ता रहेको जानकारी उनले दिए ।
साधारण सभाले चालु आर्थिक वर्षका लागि ४ करोड ३२ लाख ३५ हजार बराबरको बजेट तथा कार्यक्रम पारित गरेको छ । कार्यक्रममा कोषाध्यक्ष लक्ष्मी खत्री क्षेत्रीले आर्थिक प्रतिवेदन र सचिव सञ्जु कुमारी मल्लले प्रगति प्रतिवेदन प्रस्तुत गरेका थिए, जसलाई साधारण सभाले सर्वसम्मतिले पारित गरेको थियो ।
कार्यक्रमका प्रमुख अतिथि कपिलवस्तु डिभिजन वनका प्रमुखले सामुदायिक वन उपभोक्ताले देखाएको सक्रियता प्रशंसनीय रहेको उल्लेख गर्दै, दिगो वन व्यवस्थापन, वृक्षरोपण र स्थानीय आर्थिक समृद्धिका लागि समितिको भूमिका महत्त्वपूर्ण हुने बताएका थिए ।
त्यस्तै, वैज्ञानिक वन व्यवस्थापन महासंघका केन्द्रीय अध्यक्ष रेनु सेन, सब–डिभिजन वन पिपराका प्रमुख मोहन मिश्र, वडा नं. १ का वडाध्यक्ष, बाणगंगा र गजेहडा भूपू सैनिक खानेपानी उपभोक्ता समितिका अध्यक्ष राजेन्द्र विक्रम शाह, वडा नं. ४ का जनप्रतिनिधि तथा विभिन्न राजनीतिक दलका नेताहरूले पनि आफ्ना धारणा राख्दै साधारण सभाको सफलताको शुभकामना दिएका थिए ।
