लुदस, कपिलवस्तु
कपिलवस्तुको बाणगंगा नगरपालिका–२ मा अवस्थित बैजलपुर जनकल्याण सामुदायिक वन उपभोक्ता समूहको १३ औं वार्षिक साधारण सभा आईतबार सम्पन्न भएको छ । वनको आफ्नै सभाहलमा सम्पन्न सो कार्यक्रममा वन संरक्षण, व्यवस्थापन र पारदर्शिता सम्बन्धी विषयमा सहभागीले सुझाव दिएका छन् ।
कार्यक्रमका प्रमुख अतिथि सब डिभिजन वन कार्यालय पिपराका प्रमुख मोहन मिश्रले उमेर पुगेका रुखको व्यवस्थापन गर्दै नयाँ विरुवा रोप्ने कार्यलाई निरन्तरता दिनुपर्ने बताउनुभयो । उहाँले जथाभावी रुख कटानको प्रवृत्तिलाई रोक्नुपर्नेमा जोड दिँदै वन अतिक्रमणविरुद्ध सबै सरोकारवाला एकजुट हुनुपर्ने बताउनुभयो । मिश्रले बैजलपुर सामुदायिक वन क्षेत्रमा अतिक्रमण नहुने र वन संरक्षणमा उदाहरणीय कार्य भइरहेको भन्दै खुशी व्यक्त गर्नुभयो ।
कार्यक्रमका विशिष्ट अतिथि वडा नं. २ का वडाध्यक्ष विष्णु प्रसाद पौडेलले सामुदायिक वनले वन संरक्षणसँगै सामाजिक विकासमा समेत योगदान पु¥याएको बताउनुभयो । उहाँले वन अमूल्य सम्पत्ति भएकाले यसको संरक्षणमा सबै एकताबद्ध हुनुपर्नेमा जोड दिनुभयो । साथै वडाले विगतदेखि नै वनसँग सहकार्य गर्दै आएको र आगामी दिनमा पनि सहकार्यलाई निरन्तरता दिने प्रतिवद्धता व्यक्त गर्नुभयो ।
त्यसैगरी वैज्ञानिक वन व्यवस्थापन महासंघकी अध्यक्ष रेनु सेनले वनसम्बन्धी ऐन र नियमको दायराभित्र रहेर काम गर्दै आर्थिक पक्ष पारदर्शी बनाउनुपर्ने बताउनुभयो । विभिन्न वनमा आर्थिक अनियमितताका घटना बढ्दै गएको भन्दै उहाँले सामुदायिक वनहरू सचेत रहनुपर्नेमा जोड दिनुभयो ।
कार्यक्रममा वनका अध्यक्ष सत्यनारायण थारुले वन संरक्षण र सम्बद्र्धनलाई प्राथमिकतामा राख्दै समाज रुपान्तरणमा वनको महत्वपूर्ण भूमिका रहने बताउनुभयो । उहाँले सबै सरोकारवालाको सहकार्यबाट वनमार्फत समृद्धि हासिल गर्न सकिने विश्वास व्यक्त गर्नुभयो ।
साधारण सभामा प्रस्तुत रु. ३ करोड ८८ लाख बजेटसहितको वार्षिक कार्ययोजना सर्वसम्मत पारित गरिएको छ ।
यस्तै सो कार्यक्रममा सचिव यशोदा पाण्डेले प्रगति प्रतिवेदन, कोषाध्यक्ष रेम बहादुर रेस्मीले आर्थिक प्रतिवेदन, र लेखा समिति संयोजक नहकुल शाहीले लेखा परीक्षण प्रतिवेदन प्रस्तुत गर्नुभएको थियो । ती प्रतिवेदनहरू सर्वसम्मत रूपमा पारित गरिएका थिए ।
सचिव यशोदा पाण्डेको संचालनमा सम्पन्न उक्त साधारण सभामा सहभागी वक्ताहरूले बैजलपुर जनकल्याण सामुदायिक वनले वन संरक्षण र व्यवस्थापनमा उदाहरणीय कार्य गर्दै आएको भन्दै प्रशंसा गरेका थिए ।
