जितपुर। जिल्ला ट्राफिक प्रहरी कार्यालय कपिलवस्तुले सवारी साधनमा नियमविपरीत जडान गरिएका कालो स्टिकर हटाउने अभियान सुरु गरेको छ। अभियानको पहिलो दिनमै जिल्लाका विभिन्न स्थानमा गरिएको ट्राफिक जाँचका क्रममा ४२ वटा सवारी साधनबाट कालो स्टिकर हटाइएको छ।
जिल्ला ट्राफिक प्रहरी कार्यालय कपिलवस्तुका प्रमुख प्रहरी निरीक्षक राजन ढकालका अनुसार जिल्ला ट्राफिक प्रहरी कार्यालय तथा मातहतका ट्राफिक एकाइहरूले संयुक्त रूपमा सञ्चालन गरेको चेकजाँचमा कालो स्टिकर प्रयोग गरिएका सवारी साधनलाई नियन्त्रणमा लिई तत्काल स्टिकर हटाउन लगाइएको हो।
ट्राफिक प्रहरीका अनुसार सवारी साधनको सिसामा अत्यधिक कालो स्टिकर प्रयोग गर्दा चालकको दृश्यता प्रभावित हुने, सडक सुरक्षा तथा दुर्घटना न्यूनीकरणमा चुनौती थपिने र आपराधिक गतिविधिको अनुसन्धानमा समेत बाधा पुग्ने भएकाले अभियान सञ्चालन गरिएको हो।
सवारी तथा यातायात व्यवस्था ऐनले सम्बन्धित निकायको स्वीकृतिबिना सवारी साधनको रङ, सिट सङ्ख्या, स्वरूप, इन्जिन, चेसिस वा अन्य संरचनामा परिवर्तन गर्न निषेध गरेको छ। सोही कानुनी व्यवस्थाविपरीत जडान गरिएका कालो स्टिकर हटाउने कार्यलाई प्राथमिकताका साथ निरन्तर सञ्चालन गरिने ट्राफिक प्रहरीले जनाएको छ।
प्रहरीले सबै सवारीधनीलाई कानुनको पालना गर्न र नियमविपरीत जडान गरिएका कालो स्टिकर स्वेच्छाले हटाई सुरक्षित तथा जिम्मेवार सवारी सञ्चालन गर्न आग्रह गरेको छ।
