लुदस, गुल्मी
दुई नगरपालिका र १० गाउँपालिका गरी कुल १२ स्थानीय तह रहेको गुल्मीमा खरका छाना विस्थापित कार्यक्रमबाट नौ हजार ८५९ घरहरूमा जस्तापाता लगाइएको छ। नागरिकहरुलाई आगलागी र मनसुनजन्य विपदबाट बचाई सुरक्षित आवास निर्माणका लागि नौ हजार ८५९ घरहरुमा खरका छानाहरू विस्थापित गरी जस्तापाता लगाइएको स्थानीय तहको तथ्यांकमा उल्लेख छ।
मुसिकोट नगरपालिका गुल्मीमा एक हजार दुई सय खरका छाना भएका घरहरुमध्ये एक हजार ५८ घरहरुमा जस्तापाता लगाएको नगरपालिकाले जनाएको छ। बाँकी १४२ घरहरुमा पनि जस्तापाता लगाउने कार्य अन्तिम चरणमा पुगेको र हालसम्म करिब पाँच करोड खर्च भएको सूचना प्रविधि अधिकृत समुन्द्र विक्रम रायमाझीले जानकारी दिए।
यस्तै, रेसुङगा नगरपालिका गुल्मीमा कुल सात सय घरधुरी खरका छाना रहेकोमा सबै घरधुरीमा जस्ता पाता लगाइ सकिएको नगरपालिकाले जनाएको छ।
सबै घरधुरीहरुमा जस्तापाता लगाइसकिएकाले अब खरका छानामुक्त नगर घोषणको तयारीमा रहेको नगर प्रमुख खिलध्वज पन्थीले जानकारी दिए। जसका लागि एक करोड रुपियाँ बढी खर्च भइसकेको नगरपालिकाले जनाएको छ।
रुरुक्षेत्र गाउँपालिका आठ सय घरहरु खरका छाना भएकोमा सात सय घरहरुमा जस्तापाता लगाइसकेको र बाँकी एक सय घरहरुमा जस्ता पाता लगाउने कार्य बाँकी रहेको गाउापालिकाले जनाएको छ। यसै आर्थिक वर्षमा पालिकालाई खरका छानामुक्त घोषण गर्ने तयारीमा रहेको प्रमुख प्रशासकीय अधिकृत लक्ष्मण पाण्डेले जानकारी दिए।
चन्द्रकोटमा गाउँपालिकामा भने कुल एक हजार तीन घरहरु खरका छाना भएकोमा सात ९०२ घरहरुमा जस्तापाताहरु लगाइएको र बाँकी १०१ घरहरुमा जस्तापाता लगाउने अभियान जारी रहेको सूचना अधिकारी शिबप्रसाद ज्ञवालीले जानकारी दिए। यसै आर्थक वर्षमा खरका छानामुक्त गाउँपालिका घोषण गर्ने गरी पालिकाले तयारी गरेको उनको भनाइ छ।
यस्तै, इश्मा गाउँपालिकामा ६०५ खरका छाना भएका घरहरु जस्ता पाता लगाइएको गाउँपालिकालाई खरका छाना मुक्त गाउँपालिका घोषणको तयारीमा रहेको गाउँपालिका अध्यक्ष भगतसिंह खडकाले जानकारी दिए। जसका लागि झण्डै दुई करोड बढी खर्च भएको गाउँपालिकाले जनाएको छ।
मालिका गाउँपालिकामा एक हजार ४८६ घरहरु खरका छानाहरुमा जस्ता पाता लगाइएको र खरका छानामुक्त गाउँपालिका घोषण गर्ने प्रक्रियामा रहेको गाउँपालिकाले जनाएको छ। गाउँपालिकालाई खरका छानामुक्त गाउँपालिका घोषण गर्ने अभियानमा करिब तीन करोड ६५ लाख खर्च भएको गाउँपालिकाले जनाएको छ।
यस्तै, गुल्मीदरबार गाउँपालिकामा ६४० घरहरु खरका छाना भएकोमा ५८० घरहरुमा जस्तापाता लगाएको र बाँकी ६० घरहरुमा जस्तापाता लगाउने कार्य यस आर्थिक बर्षमा सम्पन्न हुने सूचना अधिकारी नवराज भण्डारीले जानकारी दिए। जसका लागि करिब एक करोड ५० लाख बढी खर्च भएको गाउँपालिकाले जनाएको छ।
कालीगण्डकी गाउँपालिकामा कुल दुई हजार दुई सय घरधुरी खरका छाना भएकोमा एक हजार खरका छाना विस्थापित गरी सकेको पालिका अध्यक्ष वेदबहादुर थापाले जानकारी दिए। बाँकी एक हजार दुइ सय घुधुरीहरुलाई पनि विस्तारै विस्थापित गर्दै लैजाने उनको भनाइ छ।
सत्यवती गाउँपालिकामा ८६६ घरहरु खरका छाना भएकोमा ७१७ घरधुरीमा जस्तापाता लगाइएको छ। बाँकी १४९ घरहरुमा जस्तापाता लगाउन बाँकी रहेको र यस आर्थिक वर्षमा सम्पन्न गर्ने लक्ष्य लिएको पालिका अध्यक्ष टिकाराम पाण्डेले जानकारी दिए।
छत्रकोट गाउँपालिकामा १६० घर खरका छाना भएकोमा १३० मा जस्तापाता लगाइ सकिएको छ। बाँकी ३० घरधुरीमा जस्तापाता लगाउन बाँकी रहेको प्रमुख प्रशासकीय अधिकृत वीरबहादुर पुनले जानकारी दिए। आर्थिक वर्ष २०७५।०७६ मा १६० घर छनोट भएकाले पछिल्लो समयमा त्यो संख्या वढन सक्ने उनको भनाइ छ।
धुर्कोट र मदाने खरका छानामुक्त गाउँपालिका घोषणा
धुर्कोट र मदाने गाउँपालिका खरका छानामुक्त गाउँपालिका घोषण भएका छन्। धुर्कोट गाउँपालिकाले गाउँपालिका भित्र रहेका एक हजार २४५ घर धुरीहरुमा जस्तापाता लगाई खरका छाना मुक्त गाउँपालिका घोषण गरिएको गाउँपालिकाका अध्यक्ष भुपाल पोखरेलले जानकारी दिए।
आफू निर्वाचित भएर पदभार ग्रहण गर्दा खरका छाना मुक्त गाउँपालिका घोषणा गर्ने पहिलो निर्णय सार्थक भएको पोखरेलले बताए।
खरका छाना मुक्त गाउँपालिका घोषण भएसंगै आगलागीका घटनामा कमी आउने र मनसुन जन्य क्षतीबाट बच्न सकिने गाउँपालिकाले दाबी गरेको छ।
धुर्कोट गाउँपालिकालाई खरका छानामुक्त गाउँपालिका घोषण गर्नका लागि कुल १९ करोड,२९ लाख ९४ हजार,११९ रुपियाँ लगानी भएको गाउँपालिकाले जनाएको छ।
जसअन्र्तगत जस्तापाताका लागि एक करोड ८१ लाख ९२ हजार २८७,नागरिक सुरक्षित आवासका लागि ७८ लाख ५० हजार,जनता आवासका लागि एक करोड २४ लाख ५१ हजार ८३२, एकिकृत नमुना बस्तीका लागि एक करोड ६२ लाख, भूकम्प पछिको पुन निर्माणमा १३ करोड ८३ लाख खर्च भएको पोखरेलले जानकारी दिए।
मदाने गाउँपालिकाका ७३६ घरहरु खरका छाना भएकोमा सबै घरहरुमा जस्तापाता लगाई गाउँपालिकालाई २०७८ साल फागुन २६ गते खरका छानामुक्त घोषण गरिएको प्रमुख प्रशासकीय अधिकृत शालीग्राम पन्थीले जानकारी दिए।
