थानेश्वर अधिकारी, बुटवल ।
कलाकारहरुको साझा संस्था राष्ट्रिय लोक तथा दोहोरीगीत प्रतिष्ठान, नेपाल जिल्ला कार्य समिति रुपन्देहीले तिलोत्तमा नगरपालिकामा स्थापना गरिएको क्वारेन्टाईनमा रहेका व्यक्तिहरुलाई गीत संगितबाट मनोरन्जन दिनका लागि साउण्ड सिस्टम सहयोग गरेको छ ।
संस्थाका अध्यक्ष दीपक कार्की, कोषाध्यक्ष सञ्जय सौगात, सह–सचिव विधान कार्कीले संस्थाका केन्द्रिय सचिव प्रचण्ड जि.सी. प्रदेश सदस्य रुकु पाण्डे, धन बहादुर गुरुङ· लगायतको उपस्थितीमा शनिबार बिहान क्वारेन्टाईनका संयोजक तथा वडाध्यक्ष दधिराम गौतमलाई सो साउण्ड सिस्टम हस्तान्तरण गरेको हो ।
सो अवसरमा बोल्दै संयोजक गौतमले एकान्तबासमा रहेका दाजुभाई तथा दीदी बहीनीहरुलाई मेडिटेसन तथा मनोरञ्जनका लागि सहयोग पुग्ने भन्दै संस्थालाई धन्यवाद व्यक्त गरेका छन् ।
राष्ट्रिय लोक तथा दोहोरी गित प्रतिष्ठान, नेपाल रुपन्देहीका अध्यक्ष दीपक कार्कीले कलाकारहरुको काम जनतालाई दुखमा पनि सुखमा पनि मनोरन्जन प्रदान गर्ने काम भएपनि यो महामारीको समयमा प्रत्यक्ष सहभागी भएर मनोरन्जन प्रदान गर्न नसकेपनि मनोरन्जनबाट टाढा हुन नपरोस भन्ने उदेश्यका साथ एकान्तबासमा बस्नुहुने दाजुभाई दीदीबहीनीहरुलाई साउण्ड सिस्टम प्रदान गरिएको बताए ।
उक्त साउण्ड सिस्टम आएसंगै एकान्तबासमा बस्नेहरुसंग संचारमा पनि सहयोग पुग्ने भएको छ । अहिले सम्म एकान्तबासमा बस्नेहरुलाई खाना खान, नास्ता खान बोलाउन समस्या भइरहेकोमा अब भने साउण्ड सिस्टमले गर्दा सहज हुने पनि वडाध्यक्ष गौतमले बताए । कार्यक्रममा वडाध्यक्ष तामनाथ पाण्डे, शंकरनगर स्वास्थ्य चौकी प्रमुख केशव भट्टराई लगायतको पनि उपस्थिती रहेको थियो ।
