परासी, ३० बैशाख ः
पश्चिम नवलपरासीको बर्दघाट नगरपालिकाले कन्सन्ट्रेटर उपकरणसहितको एचडीयू केन्द्र सञ्चालनमा ल्याएको छ । जिल्लामा कोराना संक्रमणको अवस्था भयावह बन्दै गएपछि नगरपालिकाले आफ्नै लगानीमा उक्त केन्द्र सञ्चालनमा ल्याएको नगर प्रमुख धीरज शर्माले बताए । अक्सिजनको अभावलाई पूर्ति गर्न केन्द्रमा ४ वटा कन्सन्ट्रेटर ( हावालाई फिल्टर गरेर बिरामीलाई दिईने विद्युतिय अक्सिजन उपकरण) जडान गरिएको छ । जिल्लामा एचडीयू केन्द्र छैनन् । जसका कारण उपचारका लागि भैरहवा, बुटवल र चितवन जानुपर्ने बाध्यता थियो । त्यहाँ पनि बेड अभाव भएर संक्रमितहरुले उपचार पाउन नसकेपछि नगरपालिकाले नयाँ भवन नै निर्माण गरेर एचडीयू केन्द्रसञ्चालन गरेको शर्माको भनाई छ । एचडीयू केन्द्रमा २० बेड छन् । केन्द्रमा अहिले गंभिर प्रकृतिका बिरामीहरुको उपचार भईरहेको छ । केन्द्रमा मेडिकल अधिकृतसहितको स्वास्थ्य टोलीले सेवा दिईरहेको छ । एचडीयू केन्द्र बाहेक नगरपालिकाले शहिद स्मृति अस्पतालमा पनि १२ बेडको अक्सिजनसहितको आईसोलेसन बनाएको छ । एचडीयू र आईसोलेसनमा बस्ने बिरामीहरुलाई निःशुल्क खानाको व्यवस्था गरिएको शर्माले बताए । आईसोलेसन र एचडीयू केन्द्रबाहेक अन्य जिल्लामा पठाउनु पर्ने बिरामीहरुका लागि पनि निःशुल्क एम्बुलेन्सको व्यवस्था गरिएको छ ।
यसैबीच एचडीयू र आईसोलेसनमा बेड थप गर्न र अझ व्यवस्थित गर्न रकम अभाव भएकाले प्रदेश सरकारसँग ४६ लाख रुपैयाँ माग गरेर पठाईएको नगरपालिकाले जनाएको छ । जिल्लामा बैशाख पहिलो सातादेखि अहिलेसम्म ५१ जनाको मृत्यु भएको छ । कुल सक्रिय संक्रमितको संख्या १२ सय २२ पुगेको स्वास्थ्य कार्यालयका कोरोना फोकल पर्सन देविलाल पौडेलले बताए । जिल्लामा कुल ८८ जनाको संक्रमणका कारण मृत्यु भएको छ ।