हरि शर्मा
परासी, ३१ बैशाख ः

जिल्ला प्रशासन कार्यालय पश्चिम नवलपरासीले निषेधाज्ञामा कडाई गरेको छ । यसअघि लगाउँदै आएको निषेधाज्ञामा बिहान ३ घण्टा पसल व्यवसायहरु खुला गर्न दिइएको थियो । भने बार मिलाएर बैंक तथा वित्तिय संस्थाहरु खुला गर्न दिइएको थियो । अहिले सबै पसल र बैंक तथा वित्तिय संस्थाहरु समेत पूर्ण रुपमा बन्द गरिएको छ । जिल्लामा संक्रमितको संख्या र मृत्यु दर बढ्न थालेपछि प्रशासनले निषेधाज्ञामा कडाई गरेको हो । एक महिनाको अवधिमा जिल्लामा ५६ जनाको मृत्यु भएको छ । सक्रिय संक्रमितको संख्या १२ सय पुगेको छ ।
प्रमुख जिल्ला अधिकारी धर्मेन्द्र मिश्रले जारी गरेको सूचनामा शुक्रबार राति १२ बजेदेखि जेठ १५ गतेसम्मका लागि निषेधाज्ञा थप गर्दै कडाई गरिएको हो । निषेधाज्ञा सूचनामा औषधि पसल र तिनका सवारी साधन, एम्बुलेन्स, दमकल, इन्धन, शववहान, पानी बोक्ने सवारी साधन र कुटनीतिक निकायका सवारी साधनबाहेक अन्यमा रोक लगाइएको छ । पत्रकारका सवारी साधनलाई सूचना विभागको परिचय पत्र आवश्यक रहने उल्लेख छ । विवाह र मलामीमा १५ जनाभन्दा बढी लैजान निषेध गरिएको छ । उद्योग तथा निर्माण कार्य सञ्चालन गर्दा कामदारलाई भित्र नै राख्नु पर्ने उल्लेख छ । राजमार्गमा चल्ने अत्यावश्यक ढुवानी निर्माण सामाग्रीहरुका सवारी साधान भने चल्न पाउने छन् । सीमा क्षेत्रको आवतजावतमा अझ कडाईका साथ निगरानी बढाउन सूचनामा भनिएको छ ।