परासी, २२ बैशाख ः
पश्चिम नवलपरासी जिल्लामा कोरोना संक्रमणको अवस्था भयावह बन्दै गएको छ । संक्रमणका कारण दैनिक रुपमा २ देखि ५ जनासम्मको मृत्यु हुने गरेको छ । पछिल्लो पटक बुधबार मात्र जिल्लामा ४ जनाको मृत्यु भएको स्वास्थ्य कार्यालयका कोरोना फोकल पर्सन देविलाल पौडेलले जानकारी दिए । दोस्रो लहरसँगै बैशाखदेखि दैनिकजसो संक्रमणका कारण मृत्यु हुने गरेको छ । गत शुक्रबारदेखि मृत्यु हुनेको संख्या झन बढ्दै गएको पौडेलले जानकारी दिए । गतशुक्रबार २ जना र शनिबार ३ जनाको मृत्यु भएको थियो । त्यस्तै मंगलबार ५ जनाको एकै दिन मृत्यु भएको थियो । बुधबार फेरि ४ जनाको एकै दिन मृत्यु भएको छ । केहीको भैरहवा मेडिकल कलेज र केहीको पृथ्वीचन्द्र जिल्ला अस्पतालमा उपचारका क्रममा मृत्यु भएको स्वास्थ्य कार्यालयले जनाएको छ । बुधबार मृत्यु हुनेमा पाल्हीनन्दन गाउँपालिका–४ की ७० वर्षीया महिला छन् । उनको पाल्ही प्राथमिक स्वास्थ्य केन्द्रको आइसोलेसनमा मृत्यु भएको हो । त्यस्तै सरावल गाउँपालिका–७ का ६० वर्षिय पुरुषको मृत्यु भएको छ । उनको पृथ्वीचन्द्र जिल्ला अस्पतालमा मृत्यु भएको हो । त्यसैगरी बुधबार नै सुनवल नगरपालिका–१ का ६४ वर्षिय पुरुष र बर्दघाट नगरपालिका–१० का २२ वर्षिय महिलाको भैरहवा मेडिकल कलेजमा मृत्यु भएको स्वास्थ्य कार्यालयले जनाएको छ । योसँगै बैशाखदेखि जिल्लामा संक्रमणका कारण मृत्यु हुनेको संख्या २४ पुगेको छ ।
दैनिकजसो मृत्यु हुने र संक्रमितको को संख्या बढ्दै गएपनि जिल्लामा भने सुविधायुक्त आइसोलेसन बनाउन कुनै पनि स्थानीय तहहले वास्ता गरेका छैनन् । जसका कारण उपचार अभावमा संक्रमितले ज्यान गुमाउनु परेको छ । जिल्लामा सुविधायुक्त आइसोलेसन नहुनु र छिमेकी जिल्लामा पनि बेड अभावहुँदा उपचार नपाएर ज्यान गुमाउनु पर्ने बाध्यता रहेको हो । गंभिर प्रकृतिका बिरामीहरुलाई उपचार गराउन पृथ्वीचन्द्र जिल्ला अस्पताल परासीमा एचडीयू केन्द्र निर्माणका लागि निर्णय भएपनि अझसम्म बन्न सकेको छैन । ‘ जिल्लास्थित कोभिड–१९ संकट व्यवस्थापन केन्द्रले अस्पतालमा १० बेडको एचडीयूसहितको आइसोलेसन निर्माण गर्ने निर्णय गरिएको छ । अहिलेसम्म बन्न सकेको छैन । ’ प्रजिअ मिश्रले भने । एचडीयू केन्द्र सञ्चालनका लागि प्रदेश सरकारसँग जनशक्ति र रकम माग गरेपनि नआएकाले सञ्चालन हुन नसकेको अस्पतालका मेडिकल सुपरिटेण्डेण्ट डा. होदाले जानकारी दिए ।
पहिलो र दोस्रो लहर गरी संक्रमणका कारण जिल्लामा ५७ जनाको मृत्यु भएको स्वास्थ्य कार्यालयले जनाएको छ ।